SQO ákimi: Investorlarǵa jer taba almadyq, bárin satyp jibergen
ASTANA. QazAqparat - Petropavlda budan bylaı jer telimderi ashyq aýktsıondar arqyly satylatyn bolady. Soltústik Qazaqstan oblysynyń ákimi Qumar Aqsaqalov jer qatynastary basqarmasynyń keńeıtilgen alqa otyrysynda osylaı dep málimdedi. Buryn jer satý saýdasy oblys ortalyǵynda ótkizilmeıtin edi. Saldarynan qazir qalada bos jer ýchaskeleriniń tapshylyǵy baıqalady, dep habarlaıdy QazAqparat aımaq ákimdiginiń baspasóz qyzmetine silteme jasap.
«Qalada bos jer telimi joqtyń qasy. Investorlarǵa jer taba almadyq. Bárin 10 jyl buryn satyp jibergen, aýktsıonsyz. Endi jer telimderi tek ashyq aýktsıon arqyly satylý kerek. Jerdi alǵannan keıin onda nysan turǵyzý qajet, óıtpegen jaǵdaıda qaıtaryp alamyz», - dedi óńir basshysy.
Atap ótilgendeı, jer telimderin satý kezinde barlyq jaǵdaılardy eskergen jón. Ásirese, demalys oryndarynda jerdi satýǵa tyıym salyndy.
«Adamdar demalatyn oryndarda jerdi múldem satýǵa bolmaıdy. Bizde saıabaqta jerdi úı turǵyzýǵa satyp jibergen. Jaıaý júrginshiler ótetin jerge baspana turǵyzý esh qısynǵa kelmeıdi», - dedi Qumar Aqsaqalov.
Atap ótken jón, byltyr oblysta 188 myń gektar jer memlekettiń menshigine qaıtarylǵan.
