SQO ákimi: Halyqtyń ál-aýqatyn jaqsartý - sharýalarǵa ortaq mindet
PETROPAVL. QazAqparat - Soltústik Qazaqstan oblysy Esil aýdanynyń Zagradovka eldi mekeninde oblys basshylyǵy, seriktestik ıeleri jáne aýdan ákimderi jınalyp, agroónerkásip keshenin damytý jáne turǵyndardyń ál-aýqatyn arttyrý mindetterin talqylady, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, Esil aýdanyna jumys saparymen barǵan oblys ákimi Qumar Aqsaqalov Zagradovka aýylynda salynyp jatqan nysandardyń qurylysymen tanysyp, 200-ge jýyq aýyl sharýashylyq qurylymdarynyń basshylary qatysqan jıyn ótkizdi.
Zagradovka - SQO-daǵy isi órge domalaǵan úlgili aýyldardyń biri. Onyń bári eńbekqor sharýalar Ivan Fısenko men ıÝrıı Sholdiń arqasy. Kásipkerler aýyl sharýashylyǵyn damytyp qana qoımaı, eldimekenniń kórkeıýine de zor úles qosyp keledi. Máselen, 2 jyl buryn «Zagradovskoe» JShS óz qarajatyna aýylǵa feldsherlik-akýsherlik pýnkt salyp, medıtsınalyq qondyrǵy qoıdy. Aýylda tis dárigeri de jumys isteıdi. «Prometeı-agro» seriktestigi jabyq hokkeı kortyn salyp, jýyrda demalys ortalyǵynyń qurylysyn aıaqtamaq. Kásipkerler jumysshylaryna 8 jańa úı turǵyzýda.
Aýdan ákimderi men seriktestik basshylaryna aýyl boıynsha ekskýrsııa uıymdastyryldy. Qazir eldi mekende 400 iri qaraǵa arnalǵan zamanaýı sút-taýar fermasy salynýda. Jýyrda suıyq mıneraldy tyńaıtqyshtar shyǵaratyn tseh iske qosylady. Qonaqtarǵa Soltústik Qazaqstanda jasalǵan birinshi bıoqazandyq ta kórsetildi. Qazir aýyldaǵy búkil úıler avtonomdy jylytý júıesine qosylǵan.
Zagradovkada oblys ákimi agrarıılermen jınalys ótkizdi. Aýdandardan 200 jýyq seriktestik basshylary keldi. Barlyǵyna mindet aıqyn: halyqtyń ál-aýqatyn jaqsartyp, áleýmettik máselelerdi sheshý.
«Biz Zagradovka aýylyna ádeıi keldik. Seriktestik basshylary Ivan Fısenko men ıÝrıı Sholdyń qalaı jumys istep jatqanyn kórsin dedik. Men bul kisilerge alǵys aıtamyn. Olar óz jumysshylaryna jáne turǵyndarǵa bar jaǵdaıdy jasaýda. Adamdar aýyldan ketip jatqan joq, kerisinshe osynda umtylýda. Óıtkeni, joǵary tabysty jumys bar, baspanamen qamtamasyz etilgen, áleýmettik ınfraqurylym jasalǵan», - dedi Qumar Aqsaqalov.
Búginde óńir halqynyń 54% aýyldy jerlerde turady. Memleketten kásipkerlerge bar jaǵdaı jasalýda, óz kezeginde seriktestik basshylary da turǵyndardyń jaǵdaıyn jasap, aýyldyń damýyna úles qosýlary kerek. Oblys ákimi Qumar Aqsaqalov jınalǵan fermerlerdi osyndaı seriktestikterden úlgi alýǵa shaqyrdy.
