SQO ákimi halyq kóp jınalatyn nysandardy tekserýdi tapsyrdy
ASTANA. QazAqparat - Soltústik Qazaqstan oblysy ákimdiginiń otyrysynda halyq kóp jınalatyn nysandardaǵy órt qaýipsizdiginiń talqylandy, dep habarlaıdy QazAqparat.
Oblystyq Tótenshe jaǵdaılar jónindegi departamenttiń basshysy Ramıl Kamalovtyń aıtýynsha, jyl saıyn oblysta 1,8 myń nysan tekseriledi, onyń 858-i adam kóp jınalatyn oryndar.
Sonyń ishinde iri 30 saýda jáne saýda-oıyn saýyq kesheniniń órt qaýipsizdigi vedomstvonyń erekshe baqylaýyna alynǵan.
«2017 jyly bul sanattaǵy 17 nysan tekserilip, 70 kemshilik anyqtalǵan, 600 myń teńgeden asa aıyppul salyndy. Kemshiliktiń kópshiligi evakýatsııa joldarynyń kóńil kónshitpeýi, avtomatty órt sóndirý quralynyń jaǵdaıynyń múshkil bolýy jáne órt bolǵan jaǵdaıda qyzmetkerlerdiń qalaı áreket etýin daǵdylandyrmaý», dedi Ramıl Kamalov.
Onyń aıtýynsha, Bas prokýratýra jáne IIM-niń tapsyrmasymen 55 iri nysanda tekserý júrgizilýde. Búginniń ózinde 18 nysan tekserilip, 79 kemshilik anyqtaldy, 9 azamat ákimshilik jaýapqa tartyldy.
«Tekserýdi qatal júrgizý kerek. Ásirese, evakýatsııalyq syrtqa shyǵatyn joldardyń jaı-kúıi, órt dabylynyń jumys isteýi, elektr qurylǵylarynyń jaǵdaıy jáne qyzmetkerlerdiń tótenshe jaǵdaı kezindegi is-áreketterine erekshe mán bergen jón», - dedi oblys ákimi Qumar Aqsaqalov.
Oblys ákimi kásipkerlerdi jazalaý tájirıbesinen alshaqtap, memlekettik organdar men bıznesmender qurylys kezindegi kemshilikterdi birlese otyryp joıý kerektigin atap ótti.
