SQO ákimi Erik Sultanov: «Aýdan ákimderiniń jumys ýaqyty qurylys alańdarynda tańǵy 7-de bastalýy tıis»
PETROPAVL. QazAqparat - Óńir basshysy apparattyq jınalys barysynda osylaı dedi. Onda «Jumyspen qamtýdyń jol kartasy 2020» baǵdarlamasyn júzege asyrý barysy da talqylandy.
Bul másele jóninde san men faktiler týraly aqparatty jumyspen qamtýdy úılestirý jáne áleýmettik baǵdarlamalar basqarmasynyń basshysy Asqar Saqypkereev baıandady.
«Aǵymdaǵy jyldyń 4 maýsymyndaǵy ahýal boıynsha 66 joba boıynsha konkýrs júrgizilgen. Onyń 3-inde jóndeý jumystary aıaqtaldy», - dedi ınfraqurylym nysandaryn iske asyrý jóninde habarlaǵan Asqar Jolamanuly.
Budan bólek, basqarma basshynyń bergen aqparaty boıynsha «Jumyspen qamtýdyń jol kartasy 2020» baǵdarlamasynyń úshinshi baǵytynyń ekinshi quramdas bóligi «Eńbek jastaryna arnalǵan turǵyn úı qurylysyn» iske asyrý aıasynda bıyl Aqqaıyń aýdanynyń Smırnovo selosynda 5 jeke turǵyn úı salynǵan. Sondaı-aq, 135 páterli 6 jastar jataqhanasy oblystyń bes aýdanynda - Aıyrtaý, Aqqaıyń, Jambyl, Jumabaev, Qyzyljar aýdandarynda turǵyzylatyn bolady.
«Árbir jumys kúnin bul jataqhanalardyń qurylys alańynda saǵat 7-den bastańdar. Saǵat 7.30-da orynbasarym Anton Fedıaevqa atqarylǵan jumys týraly aqparat berińder. Eń bastysy - irgetas. Ony 10-20 kúnniń ishinde aıaqtap, kirpish qalaýǵa kirisińder. Kólemin anyqtap, eger 500 tekshe bolsa, kúnine 10-15 teksheden qalaý kerek. Birmezette mańdaıshany jabyńdar, sylaqty daıyndap, syrtqy jáne ishki ınjenerlik-kommýnıkatsııa júıelerin júrgizip, jabdyqtańdar», - dedi Erik Hamzauly.
Sondaı-aq, basqarma basshysynyń mindetin atqarýshy Berik Áljanov asa qaýipti mal aýrýlaryn aldyn alý sharalaryn uıymdastyrý barysy týraly baıandady, dep habarlady SQO ákimdiginen.
