SQO ákimi Darıǵa Shákimovany jeńisimen quttyqtady
ASTANA. QazAqparat - Soltústik Qazaqstan oblysynyń ákimi Erik Sultanov Darıǵa Shákimovaǵa quttyqtaý jedelhatyn joldady, dep habarlaıdy ákimdiktiń baspasóz qyzmeti.
Óńir týmasy Rıo-de-Janeırodaǵy Olımpıada oıyndarynyń áıelder boksy boıynsha 75 kg deıingi salmaqta qola júldege qol jetkizgen edi.
«Soltústikqazaqstandyqtardyń jáne óz atymnan Sizdi máninde laıyqty jeńisińizben - Rıo-de-Janeırodaǵy 31-shi jazǵy Olımpıada oıyndarynyń qola júldesimen shyn júrekten quttyqtaımyn!
Qajymas qaırat, qaıtpas talap jáne urys júrgizýdiń joǵary ádis-tásilin ıgergenińizdiń arqasynda úzdikterdiń úshtiginen tabyldyńyz.
Sizdiń aıqyn jeńisińiz Olımpıadaǵy qazaqstandyq atletterdiń jeńisimen ońtaıly oraılasty. Siz Qazaqstannyń barlyq jankúıerlerine erekshe qaıtalanbas kóńil-kúı, maqtanysh sezimin syıladyńyz. Otanymyzdyń dańqyn taǵy bir márte asqaqtata otyryp, myńdaǵan jas sportshyǵa úlgi boldyńyz!», - delingen jedelhatta.
Erik Sultanov Darıǵa Shákimovaǵa myqty densaýlyq, ıgilik pen sportta jańa jetistikke jetýin tiledi.
Sondaı-aq Erik Sultanov Darıǵanyń anasy - Zeınep Kókenqyzyna da quttyqtaý jedelhatyn joldady.
Darıǵa Oralqyzy Shákimova 1988 jyldyń 20 qarashasynda Soltústik Qazaqstan oblysynda dúnıege kelgen. Halyqaralyq dárejedegi sport sheberi. Qazaqstannyń birneshe dúrkin chempıony, Azııa chempıony (2010, 2015).
