SQO ákimi baspanasy órtengen aýyl turǵyndaryna kómek kórsetiletinin aıtty

PETROPAVL. QazAqparat – Soltústik Qazaqstan oblysynyń ákimi Qumar Aqsaqalov Jelıakovo eldi mekeninde shyqqan órtke qatysty pikir bildirip, baspanasyz qalǵandarǵa kómek kórsetiletinin málim etti, dep habarlaıdy QazAqparat tilshisi.

SQO ákimi Qumar Aqsaqalov áleýmettik jelidegi óz paraqshasynda zardap shekkender kómeksiz qalmaıtynyn jazdy.

«Keshe Qyzyljar aýdany, Jelıakovo aýylynda qýraǵan shóp janyp, 3 turǵyn úı jáne bos turǵan 3 úı órtenip ketti. Qatty jel jumysty qıyndatqanymen, órt sóndirýshiler ottyń taralýyna jol bermedi. Aýylda 51 úı bar. Órttiń sebebi anyqtalyp jatyr. Zardap shekkender týystaryna ýaqytsha ornalastyryldy, olarǵa qajetti kómek kórsetiledi», - dedi Qumar Aqsaqalov.

Qazir Qyzyljar aýdanynyń volonterleri áleýmettik jelide Jelıakovo eldi mekeninde baspanasyz qalǵan turǵyndarǵa jylý jınap jatyr. Negizinen eresek adamdarǵa arnalǵan kıim-keshek, turmystyq zattar, tósek-oryn, ydys-aıaq qajet.

Esterińizge salaıyq, keshe SQO Qyzyljar aýdanyndaǵy Jelıakovo aýylynda tús kezinde órt shyǵyp, 6 úı jáne bir qora-qopsy janyp ketti. Qatty daýyldyń saldarynan órt sóndirýshiler jalynmen 7 saǵat boıy kúresti.