SQO ákimi azyq-túligi qymbat aýdandar ákimderin synǵa aldy
PETROPAVL. QazAqparat - Soltústik Qazaqstan oblysynyń ákimdiginde áleýmettik mańyzy bar azyq-túlik taýarlarynyń baǵasyn turaqtandyrý máselesi talqylandy, dep habarlaıdy QazAqparat tilshisi.
SQO ákimdigi baspasóz qyzmetiniń málimetinshe, óńir basshysy Qumar Aqsaqalov áleýmettik azyq-túlik baǵalaryna sapaly túrde monıtorıng jasalmaǵandyǵy úshin aýdan ákimderi men salalyq vedomstvo jumysyn synǵa aldy. Onyń aıtýynsha, Petropavldaǵy taýarlardyń baǵasy respýblıkamen salystyrǵanda tómen. Alaıda, aýdandarda jaǵdaı basqasha. Keıbir taýarlardyń baǵasy sharyqtap ketken.
«Aýdandarda bir taýardyń quny ártúrli. Biz keshe saýda oryndaryn tekserdik. Petropavlda bir keli qant 232 teńge tursa, Mamlıýt aýdanynda 260 teńgege barady. Maǵjan Jumabaev aýdanynda kúrish 230 teńgege, al Aqqaıyń aýdanynda 280 teńgege saýdalanýda. Aıyrmasy 50 teńge. Turaqtandyrý qorynan kúrishti 213 teńgege satyp jatyrmyz. Nege baqylaý joq?», - dep atap ótti Qumar Aqsaqalov.
Bıyl oblysta turaqtandyrý qoryna 800 tonna kókónis alyndy. Onyń ishinde 500 tonna kartop, 100 tonna sábiz, pııaz jáne qyryqqabat bar. Qazir saýda oryndarynda kartop pen pııazdyń kelisi 65 teńgeden, sábiz 77 jáne qyryqqabat 80 teńgeden satylýda. Qorda 25 myń lıtr kúnbaǵys maıy bar, lıtri 325 teńge. Taýyq jumyrtqasy 165-185 teńgege satylýda.
Oblys ákimi tıisti organdardyń basshylaryna jaǵdaıdy túzeýdi tapsyrdy. Qumar Aqsaqalov áleýmettik taýarlardyń baǵasyn baqylaýǵa depýtattar men «Nur Otan» partııasy da atsalysýy kerek dep esepteıdi. Sondaı-aq taýarlardyń baǵasyn BAQ-ta jáne áleýmettik jelilerde jıi kórsetken jón.
