SQO ákimi Azııa chempıonatynda jeńiske jetken veloshabandozdardy quttyqtady
PETROPAVL. QazAqparat - Soltústik Qazaqstan oblysynyń ákimi Erik Sultanov «Astana Pro Team» kásibı velokomandasynyń bas menedjeri Aleksandr Vınokýrovqa quttyqtaý telegrammasyn joldady, dep habarlaıdy «QazAqparat» HAA tilshisi óńir basshysynyń baspasóz qyzmetine silteme jasap.
Aımaq basshysy Aleksandr Vınokýrovty jáne Azııa chempıonatynda Qazaqstan quramasy sapynda óner kórsetken soltústikqazaqstandyq veloshabandozdardy jeńisimen quttyqtady. Olarǵa myqty densaýlyq, qajymas qaırat pen álem trassasynda jańa tabystar tiledi.
«Velosporttan Azııa chempıonatyna - Alekseı Lýtsenko, Baqtııar Qojataev pen Jandos Bıjigitov sekildi jerlesterimizdiń qatysyp, jeńiske jetkendigin maqtan tutamyz. Bul tabysqa jetý úshin elimizdiń barlyq qurama komandasynyń erik kúshi men maqsat jigeri sarp etildi. Bul jeńis - shabandozdarymyzdyń kásibıligi men sizdiń Qazaqstan velosportynyń damýyna qosqan eleýli eńbegińizdiń jemisi dep bilemin», - delingen telegrammada.
Erik Sultanov sondaı-aq sprınterlik kópsaıysta 500 metrlik qashyqtyqta kúmis júldeni jeńip alǵan soltústikqazaqstandyq sportshy Roman Krechti quttyqtady.
Kanadanyń Kalgarı qalasynda ótip jatqan álem birinshiliginde konkımen júgirýshi Roman Krech ekinshi oryndy ıelenip, buryn ózi ornatqan Qazaqstannyń rekordyn qaıta jańartty.
«Siz Qazaqstannyń túpkir-túpkirindegi jankúıerlerge umytylmas qýanysh sezimin syıladyńyz. Qazaqstandyq myńdaǵan jasqa úlgi bolyp, Otanymyzdy álemge tanyttyńyz! Sizge shyn júregimmen myqty densaýlyq pen tolaıym tabystar tileımin!», - dep aıtylǵan quttyqtaý telegrammasynda.
