SQO ákimi aımaqtaǵy qurylys jumystaryn synǵa aldy
PETROPAVL. QazAqparat - Soltústik Qazaqstanda áleýmettik nysandar men baspana qurylysyna bólingen qarjy 7 mlrd teńgege kóbeıdi, dep habarlaıdy QazAqparat oblys ákiminiń baspasóz qyzmetine silteme jasap.
Oblystaǵy qurylys jumystarynyń barysyn aımaq ákimdiginiń otyrysynda qurylys basqarmasynyń basshysy Serik Muhamedıev málimdedi. Onyń aıtýynsha, 2018 jyly bilim, densaýlyq saqtaý, mádenıet, áleýmettik qamtamasyz etý nysandary men baspana salýǵa, ınjenerlik jelilerdiń qurylysyna 18,8 mlrd teńge qarastyrylǵan. Byltyr osy baǵytqa 12 mlrd teńge baǵyttalǵan bolatyn.
Degenmen, oblys ortalyǵyndaǵy qurylys qarqyny kóńil kónshitpeıdi. Óńir basshysy qurylys kompanııalary baıaý jumys isteıtinin synǵa aldy.
«Biz ýaqytty baǵalamaımyz. Keshe keshke barlyq nysandardy aralap shyqtym, eshkim joq. Segiz aı kútip, jazdyń kelýin tosamyz. Alaıda, keshki altydan keıin qurylys alańdarynda jumys toqtap qalady. Astanaǵa qarańyzdarshy, bas qalamyzda kúni-túni jumys qyzyp jatady», - dedi oblys ákimi Qumar Aqsaqalov.
Aımaq basshysy qurylysty merziminde aıaqtamaǵan kompanııalardy qomaqty aıyppul men qara tizim kútip turǵanyn aıtty.
Petropavl ákimi barlyq kópqabatty úılerdi ýaqtyly salyp bitiremiz dep ýáde berdi.
