SQO ákimi aýylsharýashylyq ónimderin qaıta óńdeýdi arttyrýdy tapsyrdy
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov aýyl sharýashylyǵy salasyn ári qaraı damytý boıynsha tapsyrma berdi, dep habarlaıdy QazAqparat tilshisi.
Ákimdiktiń otyrysynda úsh aıdaǵy áleýmettik-ekonomıkalyq damýdy qorytyndylady.
Aýyl sharýashylyǵyndaǵy jalpy ónim 3% artyp, 24,4 mlrd teńgege jetken. Oblys ákiminiń orynbasary Asqar Saqypkereevtiń aıtýynsha, ósim mal sharýashylyǵynyń arqasynda artyp otyr. Óńirde et, sút jáne jumyrtqany kóp óndire bastaǵan. Іri qara mal basy, shoshqa, qus sany ósken.
Q.Aqsaqalov 2019 jylǵa arnalǵan josparlardy da eske túsirdi. Oblys ákimi aýyl sharýashylyǵy ónimderin óndirý men qaıta óńdeýdi ulǵaıtýǵa basa nazar aýdardy.
«Biz jańa zamanaýı fermalar qurý esebinen sút kólemin 570 myń tonnaǵa deıin ósirýimiz kerek. Bıyl oblystyń alty aýdanynda fermalar iske qosylýy tıis. Eki zamanaýı mal jemdeıtin alańnyń arqasynda óndiris kólemin 58 myń tonnaǵa deıin arttyrýymyz qajet. Bıyl etti qaıta óńdeýdi 45%-ǵa deıin jetkizýge tıispiz. Biz shoshqa sharýashylyǵy, et jáne sút óndirý boıynsha mal sharýashylyǵy kiretin úsh genetıkalyq ortalyq quramyz», - dedi Q.Aqsaqalov.
Óńir basshysy ár aýdanda ekologııalyq taza ónim óndirýmen aınalysýdy tapsyrdy.
«Biz astyqtardy qaıta óńdeý boıynsha da jumys isteýimiz kerek. Qýattylyǵ 300 myń tonnany quraıtyn «KAZMEAL» JShS zaýyty men Bıohımniń ekinshi kezeńi iske qosylýda. Jylyna qosymsha 600 myń tonnany qaıta óńdeýimiz kerek. Bul bizge astyqty qaıta óńdeý kólemin aıtarlyqtaı arttyrýǵa múmkindik beredi», - dep atap ótti oblys ákimi.
