SQO ákimi: Aýa raıynyń qolaısyzdyǵyna qaramastan, mol astyq jınaldy

PETROPAVL. QazAqparat – Soltústik Qazaqstan oblysynda aýyl sharýashylyǵy salasynyń qyzmetkerleri bir jyl boıǵy tynymsyz eńbektiń qorytyndysyn shyǵaryp, kásibı merekeni saltanatty túrde atap ótti, dep habarlaıdy QazAqparat tilshisi.

Soltústikqazaqstandyqtar jaz boıy mańdaı termen ósirgen astyqty bir dánin shashaý shyǵarmaı qambaǵa quıyp aldy. Aýa raıy bıyl óńir dıqandaryn ábigerge salǵanymen, tynymsyz eńbek pen jańa tehnologııalardy qoldaný óz nátıjesin berdi. Bıyl da sharýalar óńir qambasyna 5,1 mln tonna astyq quıdy. Sondaı-aq Qyzyljar óńiri búginde aýyl sharýashylyǵy salasyn ártaraptandyrýda el boıynsha kósh bastap keledi.

«Aýa raıynyń qolaısyzdyǵyna qaramastan, biz mol astyq jınadyq. Gektar basynan 18 tsentner ónim alyndy. Bul dıqandardyń qajyrly eńbeginiń jemisi. Osylaısha, elimizdiń azyq-túlik qaýipsizdigin qamtamasyz etýge úlesimizdi qosyp keledi», - dedi Qumar Aqsaqalov.

SQO ákimi baspasóz qyzmetiniń málimetinshe, oblysta óńdeý kásiporyndarynyń sany da jyl saıyn artyp keledi. Tek bıyl óńirde úsh tsıfrly sút fermasy paıdalanýǵa berildi. Birer jylda taǵy ony salynady dep josparlanǵan.

SQO – aýyl sharýashylyǵy salasyna ınvestıtsııa tartýda kóshbasshy. Ǵ.Músirepov aýdanynda 4 mlrd teńgege ınvestıtsııalyq joba júzege asyryldy. «Kazmeal» JShS jylyna 360 myń tonna jemazyq shyǵarady. Zamanaýı zaýyttyń qurylysyna tartylǵan ınvestıtsııanyń jartysynan astamy – sheteldik áriptesterdiń qarjysy.

Merekege oraı óńir basshysy 60 shaqty agroónerkásip salasynyń mamandaryn marapattady.