SQO ákimi áskerge shaqyrý naýqanyn baqylaýǵa alýdy tapsyrdy
PETROPAVL. QazAqparat - Soltústik Qazaqstan oblysynda osy kóktemde 700-ge jýyq adam áskerı qyzmetke shaqyrylady, dep habarlaıdy «QazAqparat» HAA tilshisi.
SQO qorǵanys isteri departamentiniń bastyǵy Erkinbek Baıbolovtyń aqparatyna súıensek, 396 adam ishki áskerge jiberildi. Jaqyn arada QR Ulttyq ulanynyń komandasy tolyqtyrylady. Áskerge shaqyrylǵan 242 azamat EKSPO-2017 halyqaralyq kórmesi ótkiziletin kezeńde qoǵamdyq tártipti kúzetýge jiberiledi.
«Áskerge shaqyrý naýqany barysynda komıssııa jumysynyń durys uıymdastyrylmaýynyń saldarynan oblystaǵy birqatar aýdandar men Petropavl qalasynda QR UQK Shekara qyzmeti 641 jáne 639A komandalaryn tolyqtyrý keıinge qaldyryldy. Medıtsınalyq komıssııany dáriger-mamandar jáne qurylǵylarmen tolyqtyrý qajet. Shal aqyn, Aıyrtaý aýdandary men Petropavlda áskerge shaqyrý beketterin qurý máselesi týyndap otyr», - dedi Erkinbek Baıbolov.
Onyń aıtýynsha, qazir áskerge shaqyrtylǵandar emhanalardan medıtsınalyq komıssııadan ótýde, biraq buǵan ruqsat etilmegen.
Qumar Aqsaqalov eshqandaı arnaıy ǵımarattyń salynbaıtyndyǵyn jáne bul máseleni qolda bar keńselerdi paıdalana otyryp, sheshý kerektigin atap ótti.
«Pragmatızm bolýy kerek. Jańa ǵımaratty salýǵa qarjy bólmeımiz. Ákimdermen birlesip, bul máseleniń sheshimin tabý kerek. Bul máseleler ótken jyly da, aldyńǵy jyly da kóterildi. Biz qazir talqyladyq, endi sheshilýi tıis. Kelesi otyrystarda bul jáıt kóterilmeýi kerek. Bul máselelerdi qaýqary jetetin basshylar sheshýi tıis nemese muny sheshe alatyn basqa adamdar jumys isteýi kerek», - dedi oblys ákimi.
Óńir basshysy aýdan ákimderi men oblys ortalyǵynyń basshysyna áskerge shaqyrý naýqanyn baqylaýǵa alýdy tapsyrdy. Densaýlyq saqtaý basqarmasynyń jańa basshysyna medıtsınalyq komıssııaǵa qajetti mamandardy tolyqtyrý máselesin sheshý týraly tapsyrma berdi.
