SQO ákimi apparatynyń laýazym ıeleri jemqorlyqqa jol berdi degen kúdikke ilindi

PETROPAVL. QazAqparat – Soltústik Qazaqstan oblysynyń sybaılas jemqorlyqqa qarsy qyzmeti oblys ákimi apparaty sharýashylyq basqarmasynyń basshysy men onyń orynbasaryna qatysty sotqa deıingi tergeýdi bastady, dep habarlaıdy QazAqparat tilshisi.

SQO boıynsha sybaılas jemqorlyqqa qarsy qyzmettiń málimetinshe, olar aldyn ala sóz baılasý arqyly merdigerlik uıym dırektorynan para almaq bolǵan. Kúdiktiler is júzinde oryndalmaǵan jumysty qabyldap, tıisti aktilerge kedergisiz qol qoıǵany úshin 2 mln 600 myń teńge suraǵan.

Sheneýnikterge qatysty sotqa deıingi tergeý bastalyp, olar Petropavl qalasy polıtsııa basqarmasynyń ýaqytsha ustaý ızolıatoryna qamaldy.

Kúdiktilerge qatysty túpkilikti sheshimdi olardyń kinásiniń deńgeıine baılanysty sot shyǵaratyn bolady.

Oblystyq ákimdik bul aqparatty rastady.

SQO ákimi baspasóz qyzmetiniń málimetinshe, ustalǵan laýazymdy tulǵalar – SQO ákimi apparatynyń «Sharýashylyq basqarmasy» KMM basshysy men onyń orynbasary. Olarǵa para aldy degen kúdikke ilindi. Vedomstvoda qyzmettik tekseris SQO ákimi apparatynyń bastamasymen júrgizilgen.