SQO ákimi Álem chempıonatynyń kúmis júldegerine páter syılady
PETROPAVL. QazAqparat – Petropavlda erkin kúresten Álem chempıonatynyń kúmis júldegeri, Azııa chempıony Nurqoja Qaıpanovty marapattady, dep habarlaıdy QazAqparat tilshisi.
Oblys ákimi Qumar Aqsaqalov soltústikqazaqstandyq sportshy, erkin kúresten Nur-Sultan qalasynda ótken Álem chempıonatynyń kúmis júldegeri Nurqoja Qaıpanovqa páter kiltin tabystady. Balýan 70 keli salmaqta kúresti.
Sportqa daryndy balalarǵa mamandandyrylǵan oblystyq mektep-ınternatynyń túlegi buǵan deıin de álemdik arenalarda bıikten kórine bildi. Álem chempıonatynyń kúmis júldegeri atanǵan sportshynyń eńbegin oblys ákimi Qumar Aqsaqalov joǵary baǵalady.
«Álem chempıonatynda ekinshi oryn alý úlken jetistik. Soltústikqazaqstandyqtardy ǵana emes, búkil Qazaqstandy qýanttyń. Bul jeńisiń birinshi ózińe qoıǵan joǵary talabyńnyń, eńbegińniń jáne jattyqtyrýshyńnyń arqasy. Biz seniń áli talaı jeńisińniń kýási bolamyz dep senemin», - dedi óńir basshysy.
Saltanatty jıynǵa sportshynyń áriptesteri, sala ardagerleri de keldi. Erkin kúres sheberi men onyń jattyqtyrýshysy Aıan Beısenbaevqa jyly lebizderin bildirdi.
Nurqojanyń jattyqtyrýshysy Aıan Beısembaevqa óńir basshysy 500 myń teńgeniń sertıfıkatyn tabys etti.
Aıan Beısenbaevtyń Nurqoja Qaıpanovty jattyqtyryp júrgenine on jyl. Osy aralyqta onyń tárbıelenýshisi kóptegen baıraqty básekelerde top jara bildi. Azııa chempıony endi Tokıoda ótetin olımpıadaǵa joldama jeńip alýdy jáne elge altyn medalmen oralýdy maqsat tutyp otyr.
