SQO ákimi 101 jastaǵy soǵys ardagerin quttyqtady

PETROPAVL. QazAqparat – Soltústik Qazaqstan oblysynyń ákimi Aıdarbek Saparov 101 jastaǵy Valentına Volkodavty merekemen quttyqtady. Valentına Arhıpovna – Uly Otan soǵysynyń ardageri, dep habarlaıdy QazAqparat tilshisi.

SQO-da kózi tiri sanaýly ǵana maıdanger qalsa, solardyń biri - 19 jasynda soǵysqa attanǵan Valentına Volkodav. Jeńisti Berlın qalasynda qarsy alǵan áıel týǵan elge tek 1945 jyldyń kúzinde ǵana oralǵan.

Búgin óńir basshysy Aıdarbek Saparov syılyǵyn alyp, Petropavl turǵyny Valentına Arhıpovnanyń úıine bardy. Bul týraly ol áleýmettik jelidegi paraqshasynda jarııalady.

«Soǵys ardageri Valentına Arhıpovna bıyl 101 jasqa toldy. Ol – qos ǵasyr kýágeri. 19 jasynda soǵysqa attanyp, Belorýs, Ýkraına maıdandarynda kópir salatyn otrıadtarda qyzmet atqardy. Áskerı otrıadtar kópirler salyp, jaýyngerlerdiń ótýine jaǵdaı jasady. Ol Edilden Berlınge deıin jetti. «Varshavany azat etkeni», «Berlındi alǵany úshin» jáne «Belorýssııany azat etkeni úshin» medalderimen, Sondaı-aq Uly Otan soǵysynyń ІІ dárejeli ordenimen marapattalǵan.

Soǵystan keıin Tselınograd qalasynda keramıka zaýytynda esepshi bolyp eńbek etti. Petropavlda 30 jylǵa jýyq turyp jatyr.

Valentına Arhıpovnaǵa myqty densaýlyq, otbasy amandyǵyn tiledim. Balalary men nemereleri kúnde qýanta bersin», - dep jazdy Aıdarbek Saparov.