Soltústik Qazaqstan AITV taralýy ortasha óńirler tobyna aýystyryldy

PETROPAVL. KAZINFORM — Soltústik Qazaqstan oblysynda qazirgi ýaqytta AITV-men ómir súretin 1400-den astam adam esepte tur. 

Oblystyq AITV ınfektsııasynyń profılaktıkasy jónindegi ortalyq dırektorynyń mindetin atqarýshy Aıman Syzdyqovanyń aıtýynsha, bıylǵy birinshi toqsannyń qorytyndysy boıynsha óńir AITV-men aýyrý deńgeıi joǵary toptan orta deńgeıdegi óńirler tobyna aýystyryldy. Bul profılaktıka jáne mamandardyń júıeli jumysynyń arqasynda múmkin bolǵan.

— Bıyl jyl basynan 34 adamǵa osy dıagnoz qoıyldy. Bul — ótken jyldyń uqsas kezeńi kórsetkishinen 30% tómen. Aýyrǵandardyń 64,7% — erler, 35,3% — áıelder. Sońǵy úsh jarym jylda óńirde balalardyń juqtyrýynyń birde-bir jańa jaǵdaıy tirkelgen joq. 2016 jyldan bastap oblys AITV-men aýyrý deńgeıi joǵary aımaqtarǵa jatqyzyldy, bul ınfektsııanyń parenteraldy berilý jolynyń kúrt ósýimen baılanysty boldy, ıaǵnı, «tuzdar» dep atalatyn sıntetıkalyq esirtkini ınektsııalyq túrde paıdalanýdyń saldary, — deıdi Aıman Syzdyqova.

Mamannyń aıtýynsha, AITV ınfektsııasynyń profılaktıkasy jónindegi ortalyqtyń aýtrıch qyzmetkerleriniń — teń nusqaýshylar nemese kóshe qyzmetkerleriniń kúsheıtilgen jumysy jáne «zııandy azaıtý» profılaktıkalyq baǵdarlamasyn engizý jaǵdaıdy ózgertti.

— Osy mamandardyń kómegimen biz jabyq ortaǵa kirip, adamdarǵa bir rettik shprıtsterdi qoldaný, AITV-ǵa testileýden ótý, emdeýdi bastaý qanshalyqty mańyzdy ekenin túsindire aldyq. Árbir aýtrıch qyzmetker ásirese ınfektsııaǵa beıim adamdarmen baılanystyrýshy. Búgingi kúni osyndaı 10 aýtrıch-qyzmetker kómektesedi. Olar AITV juqtyrý qaýpi týraly áńgimeleıdi, jergilikti jerlerde testileý úshin dárigerlerdiń kelýin uıymdastyrady, — deıdi Aıman Syzdyqova.

Qazirgi ýaqytta SQO-da AITV-men ómir súretin adamdardyń 90% antıretrovırýstyq terapııany qabyldaıdy. Sońǵy bes jylda bul kórsetkish 11,2% ósti.

Esterińizge salaıyq, SQO-da keıingi úsh jylda AITV bar anadan 30-dan astam náreste dúnıege kelgenin jazǵan edik.