SQO Ádilet departamentinde jańa basshy
PETROPAVL. KAZINFORM – Soltústik Qazaqstan oblysy Ádilet departamentin budaı bylaı Estaı Rashqalıev basqarady.
QR Ádilet mınıstrliginiń málimetinshe, jańa basshyny departament ujymyna Ádilet vıtse-mınıstri Botagóz Jaqselekova tanystyrdy. Mınıstrdiń orynbasary kezdesýde halyqtyń quqyqtyq mádenıetin arttyrý, zııatkerlik menshik quqyqtaryn qorǵaý jáne atqarýshylyq óndiris tıimdiligin qamtamasyz etý jumystaryn jalǵastyrýdyń mańyzdylyǵyn atap ótti.
Sondaı-aq, ol Estaı Rashkalıevtiń kásibıligi men basqarýshylyq qabileti qoıylǵan mindetterdi tabysty oryndaýǵa múmkindik beretinine senim bildirip, jańa qyzmetine sáttilik tiledi.
Estaı Rashqalıev 2008 jyldan bastap ádilet organdarynda qyzmet atqaryp keledi. Buǵan deıin Batys Qazaqstan oblysy Ádilet departamenti basshysynyń orynbasary laýazymyn atqarǵan. Sot jáne quqyqtyq júıede mol tájirıbesi bar.
Esterińizge salaıyq, buǵan deıin SQO Dene shynyqtyrý jáne sport basqarmasy basshysynyń mindetin atqarýshy bolyp Ádilhan Saǵyndyqov taǵaıyndalǵan edi.