Sklıar ýtılalym aqshasyn orman tehnıkasyn satyp alýǵa paıyzsyz berý usynysyn qoldamady

ASTANA. KAZINFORM — Premer-mınıstrdiń birinshi orynbasary Roman Sklıar Májilis depýtattarynyń saýalyna joldaǵan jaýapta «Jasyl damý» qarajatyn orman tehnıkasyn satyp alýǵa paıyzsyz berý múmkin emes ekenin aıtty. 

 — Saýalda kórsetilgen 12,6% mólsherindegi syıaqy stavkasyna keletin bolsaq, ol órtke qarsy tehnıkaǵa qoldanylmaıdy. Atalǵan stavka «Jasyl damý» AQ qarajaty men Ónerkásipti damytý qorynyń óz qarajatynyń aralasýy arqyly qalyptastyrylǵan jáne tek orman qyzmetkerlerine qosymsha patrýldik kólikterdi satyp alý úshin ǵana qoldanylady. Mundaı mehanızm orman mekemelerine ózderin qajetti tehnıkamen qamtamasyz etý múmkindikterin keńeıtýge múmkindik beredi, — dep jazylǵan jaýapta.

Vıtse-premer ýtılalym aqshasyn aımaqtarǵa orman tehnıkasyn satyp alý úshin paıyzsyz berý usynysy orynsyz degen paıym aıtady.

— Ýtılızatsııalyq tólem bir rettik tólem jáne bolashaqta ekologııalyq mindettemelerdi oryndaýǵa arnalǵan. Sondyqtan atalǵan qarajatty paıyzsyz qarjylandyrýǵa berý qarajatty qaıtarymdy paıdalaný jáne ekologııalyq mindetterdi oryndaý modelin iske asyrýǵa múmkindik bermeıdi, — deıdi Roman Sklıar.

Resmı málimet boıynsha, bıyl ýtılalymnan el qazynasyna 324 mlrd teńge túsken.