Sklıar SQO-daǵy kompanııa basshylaryn sý tasqyny jumystaryna kómektesýge shaqyrdy
ASTANA. KAZINFORM – Búgin QR Premer-Mınıstriniń birinshi orynbasary Roman Sklıardyń tóraǵalyǵymen Soltústik Qazaqstan oblysynyń qurylys jáne jol-qurylys kompanııalary ókilderimen jumys keńesi ótti.
Keńes barysynda Roman Sklıar bıznes ókilderiniń nazaryn aýyl turǵyndarynyń ómirine, óńirdegi áleýmettik jáne strategııalyq nysandarǵa tóngen qaýiptiń aldyn alý maqsatynda sý tasqynyna qarsy jumystardy uıymdastyrý úshin shuǵyl túrde birlese áreket etip, qolda bar barlyq kúsh pen arnaıy tehnıkany jumyldyrý qajet ekenin atap ótti.
SQO ákiminiń birinshi orynbasary Marat Tasmaǵanbetovtiń málimetinshe, oblys ákimdigi turǵyn úıler men áleýmettik-mádenı nysandar salyp jatqan óńirlik jol jáne qurylys kompanııalaryn sý tasqynyna qarsy jumystarǵa tartty. Onyń sózinshe, kásipkerler tehnıkadan bólek, qajet bolǵan jaǵdaıda arnaıy tehnıkany rezervtegi JJM-men qamtamasyz etýge nıet bildirgen.
Roman Sklıar kompanııa basshylaryna tehnıka men adam kúshterin tartýdan bólek, ózderiniń de obektilerdegi baqylaý jáne úılestirý jumystarynyń basy-qasynda bolýyn tapsyrdy.
Keńes qorytyndysy boıynsha vıtse-premer Úkimet basshysy men onyń orynbasarlary sý tasqynyna qarsy sharalardy úılestirý úshin óńirlerde júrgenin jáne jaǵdaıdy Prezıdent jeke baqylaýynda ustap otyrǵanyn eske saldy.
«Qazir qalany qorǵaý kerek. Aldaǵy kúnderi osy mindetti oıdaǵydaı atqarǵannan keıin, kómek qajet bolyp jatqan óńirlerge, aýdandarǵa aýysamyz. Sol sebepti bárimiz bir adamdaı jumylyp, sý tasqynyna qarsy jumystarǵa dereý kirisýimiz qajet. Baıaý jáne retsiz jumys isteýge bolmaıdy. Barlyq jumysty oryndaýǵa úsh kúnimiz ǵana bar», — dedi Roman Sklıar.
Eske sala keteıik, buǵan deıin vıtse-premer Nurlan Baıbazarov Batys Qazaqstan oblysyndaǵy sý basqan jáne sý basý qaýpi bar aýmaqtarǵa, sondaı-aq Oral qalasy mańyndaǵy saıajaılarǵa barǵanyn habarlaǵan edik.
