Sklıar olıgopolııa týraly: Biz shynymen de Jańa Qazaqstanda turyp jatyrmyz

ASTANA. KAZINFORM — Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda eldegi olıgopolııamen kúres týraly pikir bildirdi. 

— Memleket 2022 jylǵy qańtar oqıǵasynan keıin olıgopolııany qurtýǵa ýáde berdi. Biraq úsh jyldan keıin qarasaq, Vıacheslav Kım, Tımýr Qulybaev, Tımýr Týrlov sııaqty Forbes tizimin bastap turǵan azamattar baıýdyń ústine baı túsken. Al kedeılik sheginen tómen deńgeıde kún kórip jatqan halyqtyń sany ózgerissiz qalyp otyr — 1 mln adamnyń tóńireginde. Nege bulaı, — dep surady jýrnalsıt.

Premer-mınıstrdiń orynbasary suraq avtoryn Qazaqstanda olıgopolııa joq ekenine sendirip baqty.

— Olıgopolııa týraly aıtsaq, bárińiz bilesizder, kelisýińiz de múmkin, kelispeseńiz de bolady, biraq shyndyq osy. Biz shynymen de Jańa Qazaqstanda ómir súrip jatyrmyz. 2022 jyly bárimiz úlken synaqtan óttik. Jańa Qazaqstandy qurýymyz kerek degen málimdeme jasadyq. Bizde olıgopolııa joq. Bul týraly naqty aıta alamyn, — dedi ol.

Onyń paıymdaýynsha Forbes tizimindegi yqpaldy kásipkerler memlekettiń ekonomıkalyq saıasatyna áser ete almaıdy.

— Siz olıgopolııaǵa jatqyzyp otyrǵan adamdar, olıgopolııa retinde ataǵyńyz kelip turǵan kompanııalar memlekettiń jumysyna yqpal ete almaıdy. Olar memlekettik organdar qabyldaıtyn sheshimderge yqpal etip otyrǵan joq. Olar Parlamenttiń sheshimderine, zań shyǵarý bastamalaryna yqpal etpeıdi. Premer-mınıstr tóraǵalyq etetin arnaıy komıssııa monopolııasyzdandyrý jumystary aıaqtalyp qaldy deýge bolady. Aktıvterdi qaıtarý júrip jatyr. Buǵan deıin elde jumys istegen kásipkerler ári qaraı da óz qyzmetin júrgizýge haqyly, — dedi birinshi vıtse-premer.

Aıta keteıik, keshe Roman Sklıar Airbus-tyń Eýropa boıynsha prezıdenti Joan Pelısemen avıatsııa salasyndaǵy yntymaqtastyqty damytý jaıyn talqylap, Qazaqstan aýmaǵynda azamattyq jáne memlekettik avıatsııa ushaqtaryn jóndeý men qyzmet kórsetý ortalyǵyn ashý qajettigin málimdegen bolatyn.