Sklıar «Qorqyt Ata» halyqaralyq áýejaıynyń jańa termınaly jumysymen tanysty
QYZYLORDA. KAZINFORM — QR Premer-mınıstriniń birinshi orynbasary Roman Sklıar bastaǵan Úkimet delegatsııasy Qyzylorda oblysyna jumys saparymen bardy.
Sapar barysynda delegatsııa óńirdegi birqatar nysandy, sonyń ishinde Qyzylorda qalasyndaǵy «Qorqyt Ata» halyqaralyq áýejaıynyń jańa termınaly jumysymen tanysty.
Termınal Memleket basshysynyń tapsyrmasymen ótken jyldyń qarashasynda Qazaqstan Premer-mınıstri Oljas Bektenovtiń qatysýymen ashylǵan bolatyn. Nysannyń qurylysyna 16,6 mlrd teńge jeke ınvestıtsııa salyndy. Jergilikti bıýdjetten ınjenerlik-kommýnıkatsııalyq ınfraqurylymǵa 4,3 mlrd teńgeden astam qarjy bólindi.
Ári qaraı Roman Sklıar delegatsııa múshelerimen Qyzylorda qalasynda júzege asyrylyp jatqan «Jolaýshylar vagondaryn jóńdeý, tehnıkalyq qyzmet kórsetý kesheni jáne vagon qurastyrý zaýyty» jobasy tanystyryldy. Jobaǵa 15,4 mlrd teńge ınvestıtsııa tartylyp, ony iske asyrý eki kezeń boıynsha júzege asady.
Keshenniń josparlanǵan qýaty jolaýshylar vagondaryn jóndeý men qyzmet kórsetýdi jaqsartýǵa, sondaı-aq jańa úlgiler shyǵarýǵa múmkindik beredi. Bul Qazaqstanda, onyń ishinde óńirde temirjol kóliginiń damýyna oń áser etedi.
Úkimet delegatsııasy odan ári qaraı kirpish zaýytynyń qurylysyn jáne shyny zaýytynyń jumysymen tanysty. Kirpish zaýytyna Qyzylorda qalasyndaǵy «Óndiris» ındýstrııalyq aımaǵynan 7 gektar jer telimi berildi, jylyna 90 mln dana kirpish shyǵarylady degen jospar bar.
Shyny zaýytynda jylyna 197,1 myń tonna shyny óndirilip, Reseı Ózbekstan, Qyrǵyzstan jáne Tájikstanǵa eksporttalady. Búginde zaýytta 366 maman jumys isteıdi. Ótken jyly shyny zaýyty ishinen energııa únemdeıtin shyny óndirisiniń jańa jelisi iske qosyldy. Qytaılyq ınvestor aldaǵy ýaqytta 2 kezeńge josparlanǵan jańa ınvestıtsııalyq jobany iske asyrmaq.
Roman Sklıar sonymen qatar Qyzylordadaǵy jańa JEO qurylysynyń barysymen tanysty. Jobanyń quny — 215 mlrd teńge, qýaty — 240 MVt. Búgingi tańda ınvestor — «Aqsa Energı» túrik kompanııasy nysannyń qurylysyna 135 mlrd teńgeden astam qarjy saldy. Jańa JEO iske qosylǵan kezde óńirdi elektr energııasymen tolyq qamtamasyz etedi.
Sonymen qatar úkimettik delegatsııa aımaqtaǵy jol ınfraqurylymyn damytý máselesi nazarda boldy. Roman Sklıar «Táýelsizdikke — 25 jyl» dańǵylyn qaıta jańǵyrtý barysyn kórdi. Ótken jyldan beri Beıbarys sultan kóshesinen Ábilqaıyr han kóshesine deıingi Syrdarııa ózeniniń qorǵanys bógeti nyǵaıtylyp, atalǵan dańǵyldyń 6,7 shaqyrymy qaıta jańǵyrtyldy.
«Jaıly mektep» ulttyq jobasy aıasynda Qyzylorda oblysynda 6,9 myń oryndyq 10 mektep salý josparlanǵan. Búgingi tańda onyń ishinde 5 mektep paıdalanýǵa berildi. Bıyl qalǵan 5 oqý ornynyń qurylysyn aıaqtaý josparlanýda.
Sonymen qatar oblystyq bıýdjetten halyqaralyq standarttarǵa sáıkes keletin 11 myń oryndyq stadıon salýǵa 20,9 mlrd teńge bólindi. Búgingi tańda Shyǵys jáne Batys trıbýnalarynyń metall konstrýktsııalaryn montajdaý tolyǵymen aıaqtaldy, qabyrǵalar, ishki bólimder jáne syrtqy vıtrajdar tóselýde.
Roman Sklıar jańa avtovokzaldyń jumysymen de tanysty. Ol ótken jyly paıdalanýǵa berildi. Ǵımarat jolaýshylarǵa qajetti jabdyqtarmen jabdyqtalǵan jáne 200 adamǵa arnalǵan. Jobanyń quny — 975 mln teńge.
Aıta ketý kerek, óńirde shaǵyn ónerkásiptik aımaqtardy qurý boıynsha da belsendi jumystar júrgizilýde. Bul óz kezeginde halyqty jumyspen qamtý, shaǵyn jáne orta bıznes sýbektileri úshin ınfraqurylym máselelerin sheshýge yqpal etedi.
Sońǵy úsh jylda óńirde qurylys jumystarynyń kólemi ulǵaıdy. Ótken jyldyń qorytyndysy boıynsha ósim 153,8%-dy qurady. Іske qosylǵan turǵyn úı kólemi ósti, ol rekordtyq kórsetkishke — 866,8 myń m2 jetti. Eger 2022–2023 jyldary 4 myńǵa jýyq páter paıdalanýǵa berilse, ótken jyly kiltterdi 2,5 myńnan astam otbasy tapsyrdy. Sonymen qatar, halyqtyń áleýmettik osal toptary úshin turǵyn úı satyp alý boıynsha Qyzylorda oblysy respýblıkada 1948 páter kórsetkishimen 2-shi oryndy ıelendi.
QR Premer-mınıstriniń birinshi orynbasary Roman Sklıar oblysta atqarylǵan jumystardy atap ótip, Qyzylorda óńiri respýblıkanyń ońtústiginde ekonomıkalyq ósimniń draıveri bolýǵa tıis ekenin atap ótti.
Buǵan deıin Úkimette salyq reformasy máselesi talqylanǵanyn jazǵan edik.