Sklıar Kólik mınıstriniń qyzmetinen bosatylýy jaıynda: Adamdar keledi, ketedi

ASTANA. KAZINFORM – Premer-mınıstrdiń birinshi orynbasary Roman Sklıar Marat Qarabaevtyń Kólik mınıstri laýazymynan bosatylýyna qatysty pikir bildirdi.

- Aǵymdaǵy protsess – adamdar keledi, ketedi. Mınıstrler jumys isteıdi, mınıstrlerdi qyzmetinen bosatady. Munan erekshe eshteńe kórip turǵanym joq, - dedi Úkimet basshysynyń birinshi orynbasary Aqordada BAQ ókilderiniń saýalyna oraı.

Sonymen qatar ol Qarabaevtyń qyzmetinen ketýinde qandaı da bir sebeptiń bolýy múmkin ekenin jasyrǵan joq.

- Qandaı da bir sebebi bar shyǵar. Ol jaıynda qazir aıtqym kelip turǵan joq. Árbir jańa kezeń basshylyqty tyń talaptarǵa májbúr etedi. Sheshilýi tıis tapsyrmalar bar. Qarabaev mınıstrlik aldynda turǵan tapsyrmalardyń bir bóligin sheshti. Qazir jańa basshysy jalpy vedomstvo aldynda turǵan tapsyrmalardy sheshetin bolady. Ózderińiz de bilesizder, Memleket basshysy tarapynan óte aýyr syn boldy. Mınıstrlerdiń birine baǵa bergim kelmeıdi. Menińshe, kimniń qalaı jumys istegenin, qandaı máselelerdi sheshkenin ýaqyt kórsetedi, - dedi Roman Sklıar.

8 maýsym kúni Memleket basshysynyń Jarlyǵymen Marat Kárimjanuly Qarabaev Kólik mınıstri laýazymynan bosatylǵan edi.

Aıta keteıik, qazirgi ýaqytta Memleket basshysy Qasym-Jomart Toqaev pen elimizge resmı saparmen kelgen Slovakııa Premer-mınıstri Robert Fıtso joǵary deńgeıde kelissóz júrgizip jatyr.