Sklıar qytaılyq kompanııa basshylyǵymen jel elektr stansalaryn salý jobasyn talqylady
ASTANA. KAZINFORM – QR Premer-Mınıstriniń birinshi orynbasary Roman Sklıar China Power International Holding (CPIH) vıtse-prezıdenti Renagýlı Týerdımen kezdesti.
Kelissózderdiń negizgi taqyryby Memleket basshysy Qasym-Jomart Toqaevtyń byltyr mamyr aıynda Sıan qalasyna (QHR) sapary sheńberinde qol jetkizilgen ýaǵdalastyqtardy iske asyrýdy jalǵastyrý jóninde boldy.
Qytaılyq kompanııa Qazaqstannyń Jambyl men Pavlodar oblystarynda jalpy qýaty 1 GVt bolatyn jel elektr stansalaryn (JES) salý jobasyn júzege asyryp jatyr.
Kezdesýde jobalardy tehnıkalyq iske asyrýdyń naqty máseleleri talqylandy. Olardyń qatarynda qosalqy stansalardy, qajetti qýattardy daıyndaý jáne ólsheý rásimderi qaraldy.
Sonyń nátıjesinde jobalardy qysqa merzimde engizý úshin qajetti tehnıkalyq protsesterdi jedeldetý týraly ýaǵdalastyqqa qol jetkizildi.
