Sklıar: Ken men kontsentratty syrtqa shyǵarýǵa múddeli emespiz

ASTANA. KAZINFORM — Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda Qazaqstan ınvestıtsııany qaı salalarǵa kóbirek tartýǵa múddeli ekenin málim etti. 

— Іlki ınvestıtsııalyq jobalarǵa kelsek, árıne, birinshi kezekte qaıta óńdeý salasyna tartylatyn ınvestıtsııanyń kóbeıgenine múddelimiz. Odan keıin taý-ken ónerkásibi de biz úshin basym baǵyt. Bizge resýrstyq bazamyzdy arttyrý kerek. Qoldaǵy bar jáne barlanyp, dáleldenetin resýrs bazasy óńdeý salasyn damytýǵa serpin bolady. Biz ken men kontsentratty syrtqa shyǵarýǵa múddeli emespiz. Kerisinshe shıkizatty ózimizde óńdeýge múddelimiz, — dedi ol.

Birinshi vıtse-premer bul ustanym tek qatty paıdaly qazbalarǵa ǵana qatysty emes ekenin atap ótti.

— Qazir polıpropılen óndiretin zaýyt jumys istep turǵanyn kórip otyrsyzdar. Polıetılen, býtadıen zaýyttary salynyp jatqanyn bilesizder. Osylaısha óńdeý salasymen baılanysty baǵyttardy damytamyz, — dedi Roman Sklıar.

Aıta keteıik, keshe Roman Sklıar Airbus-tyń Eýropa boıynsha prezıdenti Joan Pelısemen avıatsııa salasyndaǵy yntymaqtastyqty damytý jaıyn talqylap, Qazaqstan aýmaǵynda azamattyq jáne memlekettik avıatsııa ushaqtaryn jóndeý men qyzmet kórsetý ortalyǵyn ashý qajettigin málimdegen bolatyn.