Skills Enbek: jyl basynan beri 9,9 myń jumyssyz onlaın bilim aldy
ASTANA. KAZINFORM — 2026 jyldyń basynan beri 27,5 myń azamat, onyń ishinde 9,9 myńǵa jýyq jumyssyz Skills Enbek kásiptik oqytý platformasynda (budan ári — Platforma) onlaın-kýrstardan ótkeni týraly sertıfıkattar aldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Platformada barlyǵy 1,2 mln-nan astam qazaqstandyq, onyń 44,7 myńy — aǵymdaǵy jylda tirkeldi. Bul rette Platforma jumysynyń barlyq kezeńinde 1,1 myń adam oqýdan ótti.
— Oqýdy aıaqtaǵan 9,9 myń jumyssyz azamattyń 2,4 myńy — jastar (16–35 jas aralyǵy). Oqytylǵandar negizinen Shymkent qalasynan (1 778 adam), Aqtóbe oblysynan (1 359 adam) Týrkestan oblysynan (1 088 adam), Qaraǵandy oblysynan (911 adam) boldy. Búgingi tańda Platformada avtorlar ártúrli baǵyttar boıynsha 570 kýrs jarııalady, onyń 385-i — tegin. Sondaı-aq, odan ári oqý úshin bilim berý alańdaryna aýysý múmkindigimen Fluent Education jáne ıAndeks Qazaqstan seriktesteriniń kýrstary bar. Kýrstardyń uzaqtyǵy 2-dan 72 saǵatqa deıin, — delingen habarlamada.
Platformada áleýmettik qyzmet kórsetý jáne t. b. salalardaǵy túrli mamandyqtar boıynsha tegin kýrstar sany únemi artyp keledi. 2026 jylǵy qańtar-aqpan aılarynda sertıfıkattardyń eń kóp sany myna kýrstar boıynsha berildi: «Kassır» (2 561 sertıfıkat), «Kýrs po fınansovoı gramotnostı» (1 369 sertıfıkat), «Professıonalnyı kýrs ındıvıdýalnogo pomoşnıka dlıa soprovojdenııa lıts s trýdnostıamı v peredvıjenıı» (787 sertıfıkat), «Vvedenıe v sotsıalnýıý rabotý» (216 sertıfıkat).
Buryn habarlaǵandaı, platforma halyqtyń bilim deńgeıi men kásibıligin arttyrýǵa, mansaptyq damýdy yntalandyrýǵa jáne «ómir boıy oqytý» tujyrymdamasyn ilgeriletýge baǵyttalǵan. Ol marketpleıs — qyzmetter naryǵy qaǵıdaty boıynsha onlaın kýrstarǵa qol jetkizýdi usynatyn halyqaralyq oqytý alańdaryna uqsas qurylǵan.
Oqýǵa siltemesi arqyly nemese Elektrondyq eńbek bırjasynda (Enbek.kz) «Onlaın oqytý» bólimin tańdaý arqyly qol jetkizýge bolady.
Platformada bilim alýshy oqytýdyń qolaıly qarqyny men tilin, materıaldy berýdiń yńǵaıly prıntsıpin derbes tańdap, bilim berý úderisindegi óziniń ilgerileýin baqylaı alady.
Bilim alýshy úshin mynadaı artyqshylyqtar bar: keńeıtilgen kýrstardy izdeý múmkindigi, sabaqtyń túsinikti qurylymy, oqý protsesin baqylaı alý jáne kýrs avtorlarymen jyldam ózara árekettese alý. Paıdalanýshylarǵa jasandy ıntellekt negizindegi chat-bot qoljetimdi, ol qajetti aqparatty jyldam izdeýge jáne suraqtarǵa jaýap alýǵa múmkindik beredi.
Oqý aıaqtalǵannan keıin bilim alýshy 70% shekti deńgeımen testileý tapsyrýy tıis. Onlaın kýrsty sátti aıaqtaǵan jaǵdaıda daǵdylardy ıgerýi týraly sertıfıkat beriledi. Kýrsty aıaqtaýdyń mindetti sharty — bilim alýshy tarapynan kýrsty baǵalaý. Sertıfıkatty júkteý kezinde ıgergen daǵdylar boıynsha Enbek.kz-te bos jumys oryndaryn usyný fýnktsııasy qosyldy.
Alynǵan sertıfıkat Enbek.kz-te tirkelgen kezde bilim alýshynyń túıindemesinde avtomatty túrde kórsetiledi. Qyzmetkerlerdi izdeý kezinde áleýetti jumys berýshi Platformada oqýdy sátti aıaqtaǵan sertıfıkat ıelerin kóre alady.
Platformada onlaın kýrstardy avtorlar men ázirleýshiler tegin ornalastyrady. Kýrstardy memlekettik, orys jáne aǵylshyn tilderinde júkteýge bolady, aqparat ártúrli formatta: mátin, prezentatsııa, beıne jáne aýdıo materıaldar, ınfografıka jáne basqa da ádistermen berilýi tıis. Platforma erekshe qajettilikteri bar bilim alýshylar úshin ınterfeısti beıimdeý múmkindigin boljaıdy.
Kýrs avtorlary úshin yńǵaıly sabaq qurastyrý, jarııalanǵan kýrstardyń statıstıkasy men tıimdiligin qaraý, sertıfıkattardy túrli dızaında jasaý, sondaı-aq oqý qunyn aldyn ala esepteýge arnalǵan onlaın-kalkýlıatordy qoldaný múmkindikteri qarastyrylǵan.
2023 jylǵy jeltoqsannan bastap kýrstardy Enbek mobıldi qosymshasy arqyly da ótýge bolatynyn esterińizge sala keteıik. Qosymshany Google Play jáne AppStore dúkenderinen júktep alýǵa bolady.
Osyǵan deıin aýyldardaǵy jumyssyzdar sany qansha ekenin jazǵanbyz.
