SKI-Alpınızm: UOK pen Alpınızm jáne sporttyq jartasqa órmeleý federatsııasy jańa sport túrin damytpaq
ASTANA. KAZINFORM – Qazaqstan Ulttyq Olımpıadalyq komıtetiniń basshysy Gennadıı Golovkın Alpınızm jáne sporttyq jartasqa órmeleý federatsııasynyń prezıdenti Nursultan Shoqanovpen kezdesý ótkizdi, dep habarlaıdy Olympic.kz.
Kezdesý barysynda federatsııanyń aldaǵy Olımpıada oıyndaryna qatysty mindetteri (Mılan-Kortına-2026, Los-Andjeles-2028), sonymen birge quramanyń aldaǵy Harbınde ótetin qysqy Azııa oıyndaryndaǵy maqsattary talqylandy.
Aıta ketelik, federatsııa eki olımpıadalyq sport túrine jetekshilik etedi. Olar – sporttyq jartasqa órmeleý men skı-alpınızm. Sporttyq jartasqa órmeleý 2020 jylǵy Tokıodaǵy jáne 2024 jylǵy Parıjdegi oıyndarda jankúıerlerdiń qyzyǵýshylyǵyn oıatyp, Olımpıada oıyndarynyń baǵdarlamasyna myqtap ense, skı-alpınızm endi ǵana tanylyp keledi.
Skı-alpınızm – bul 2026 jylǵy Olımpıada oıyndarynda alǵash ret usynylatyn jańa olımpıadalyq sport túri. Ol taýǵa shańǵymen shyǵyp, qatty jyldamdyqpen túsý kezinde kúrdeli ýchastoktardan ótý úshin alpınızm mashyqtaryn qoldanýdy qamtıdy.
Qazirgi tańda Qazaqstanda halyqaralyq deńgeıde jarysa alatyn sportshylar áli bar. Alaıda munyń aldynda olar taǵy bir mańyzdy jarys – 7-17 aqpan aralyǵynda Harbınde ótetin Azııa oıyndary kútip tur.
«Sporttyq jartasqa órmeleý jáne skı-alpınım – bul áleýeti zor jáne qarqyndy sport túri. Qazaqstan quramasy eki aınalym ishinde sportyq jartasqa órmeleýden úlken nátıjege qol jetkizdi. Amır Maımuratovtyń keremet óner kórsetýi barlyǵynyń esinde, ol kvalıfıkatsııa raýndynda rekord ornatyp, Oıyndar qorytyndysy boıynsha bes úzdik sportshy qataryna engen. Búginde bizdiń quramǵa aldyn ala alty sportshy enip otyr. Olar Harbındegi qysqy Azııa oıyndarynda óner kórsetpek. Daıyndyqty bastap ketti. Harbındegi jarystardan soń qorytyndy jasap, quramdy retteımiz, Mılan-Kortındegi Olımpıadaǵa joldama alý úshin daıyndyq jáne basqa da dúnıelerdi qolǵa alamyz», - dedi Nursultan Shoqanov.
