Іskerlik jáne ınvestıtsııalyq ahýaldy jaqsartýdy aıryqsha nazarda ustaımyz – Prezıdent
ASTANA. KAZINFORM – Qazaqstan shetel ınvestıtsııasyn tartý kórsetkishi boıynsha tutas aımaqta kósh bastap tur. Bul týraly Prezıdent Qasym-Jomart Toqaev elordada «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda aıtty.
– Investıtsııa tartýdyń taǵy bir mańyzdy faktory bar. Astana halyqaralyq qarjy ortalyǵynda Sot pen Arbıtraj ortalyǵy aǵylshyn quqyǵy qaǵıdattaryna saı jumys isteıdi. Elimizde Úkimet janynan Investıtsııalyq shtab qurylǵan. Atalǵan shtab sońǵy ýaqytta ınvestıtsııalyq jobalarǵa qatysty túıtkildi máselelerdi jedel sheshý arqyly óziniń tıimdiligin kórsetti, – dedi Memleket basshysy.
Sonymen birge, Prezıdent Jarlyǵymen Bas prokýratýrada Investorlardyń quqyqtaryn qorǵaý komıteti quryldy.
– Biz iskerlik jáne ınvestıtsııalyq ahýaldy jaqsartýǵa barynsha múddeli memleket retinde osy saladaǵy jumysty aıryqsha nazarda ustaımyz. Qazir Qazaqstan shetel ınvestıtsııasyn tartý kórsetkishi boıynsha bizdiń aımaqta kósh bastap tur, – dedi Qasym-Jomart Toqaev.
Aıta keteıik, elordada Memleket basshysynyń qatysýymen eldegi ákimshilik ádiletke arnalǵan forým ótti.
Buǵan deıin Prezıdent ınvestıtsııalyq daýlardyń 80% ınvestorlar paıdasyna sheshilgenin aıtqan edi.
