Іskerlik belsendilik ındeksi: óndiris pen qyzmet kórsetý sektorynda ósim saqtaldy

ASTANA. KAZINFORM — 2025 jylǵy qazanda Qazaqstandaǵy iskerlik belsendilik ındeksi 50,6 deńgeıinde boldy (qyrkúıekte – 50,9). Bul kórsetkish 2024 jylǵy naýryzdan beri oń aımaqta tur, ıaǵnı iskerlik belsendilik áli de ósip keledi. Bul týraly iskerlik belsendilik týraly QUB Aqsha-kredıt saıasaty departamentiniń dırektory Rústem Orazalınniń túsindirmesine silteme jasap, Ulttyq bank málim etti. 

Óndiris, qyzmet kórsetý jáne saýda salalarynda belsendilik saqtalýda: óndiriste ındeks 53,0, qyzmet kórsetý sektorynda – 50,6, saýdada – 50,28 boldy. Bul kórsetkishter ósim bar ekenin ańǵartsa kerek. 

Al qurylys pen taý-ken óndirisinde jaǵdaı nasharlaý baǵytynda: taý-ken ónerkásibinde ındeks qyrkúıektegi 49,4-ten qazanda 48,5-ke tómendedi, al qurylys salasynda kórsetkish shamamen 49,5 deńgeıinde turaqty qaldy.

Bıznes júrgizýdiń keleshegin baǵalaý kórsetkishi tómendep, 7,1 boldy (qyrkúıekte – 10,1). Degenmen, jalpy kórsetkishter oń, ıaǵnı bıznes-tsıkl «saǵaty» ósim baǵytynda qaldy.

Kásiporyndardyń aıtýynsha, ónimder men qyzmetterge suranys qarqyny jalpy ózgermegen, biraq taý-ken ónerkásibinde suranys aıtarlyqtaı báseńdegen.

Ulttyq bank buǵan deıin 1 qańtardan bastap zeınetaqy aktıvterin basqarý tártibi ózgeretinin aıtty.