Іskerlik ahýal: óndiris pen qyzmet kórsetý sektorynda oń kórsetkish baıqaldy
ASTANA. KAZINFORM — Bıyl naýryzdaǵy iskerlik belsendilik týraly Ulttyq banktiń Aqsha-kredıt saıasaty departamentiniń dırektory Rústem Orazalın túsindirdi. Bul týraly banktiń baspasóz qyzmeti málim etti.
— Bıylǵy naýryzda óndiris pen qyzmet kórsetý salasyndaǵy iskerlik belsendilik oń kórsetkishte boldy: tıisti ındekster 50,5 jáne 50,7 deńgeıinde qalyptasty. Al qurylys, saýda jáne taý-ken ónerkásibinde jaǵdaı tómendeý tendentsııasynda bolyp, ındekster tıisinshe 44,6, 48,0 jáne 49,6 deńgeıinde ekenin ańǵartty, — delingen habarlamada.
Al bıznes-ahýal ındeksi (BAI) jaqsaryp, 7,6 (aqpanda — 3,8) boldy. Bıznes-tsıkl «saǵatynyń» ındıkatory ósý aımaǵyna ótti. Qazirgi ahýalǵa berilgen baǵa azdap qana oń nátıje kórsetti, al keleshek jaǵdaıǵa qatysty optımızm aıtarlyqtaı jaqsardy.
Sonymen qatar respondentter suranys óndiris pen qyzmet kórsetý sektorynda jaqsarǵanyn, saýda men qurylysta — birshama tómendegenin atap ótti.
Eske sala keteıik, byltyr Memleket basshysy kvazımemlekettik sektor sýbektilerin qurýǵa moratorıı engizilgenin aıtqan edi. Retteletin satyp alýlarǵa bıznes ókilderi ótinim bergen jaǵdaıda, oǵan memlekettik kásiporyndardyń qatysýyna zań júzinde shekteý qoıyldy. Bıznesti negizsiz qyspaqqa alýdan jáne salalyq organdardyń zańsyz tekserýinen qorǵaý úshin júıeli jumys qolǵa alyndy. Qylmystyq kodekstiń bes baby izgilendirildi. Eki bap boıynsha qylmystyq jaýapkershilikke tartý talaptary joǵarylady, ekonomıkalyq quqyq buzýshylyqtyń 29 túri boıynsha tutqyndaýǵa tyıym salyndy. 2022 jyldan beri kásipkerlik salasynda tirkelgen qylmystyq isterdiń sany eki ese qysqardy.
Budan bólek, kásipkerlik qyzmetke zańsyz aralasqany úshin ákimshilik jaýapkershilik kúsheıtilgeni habarlandy. Investorlardy negizsiz tekserýdiń, olarǵa aıyppul salýdyń aldyn alyp, ruqsattama berýge kedergi keltirmes úshin «prokýror súzgisi» engizildi. Búginde prokýrorlar ınvestor quqyǵyn buzatyn 700-den asa faktige tosqaýyl qoıdy. Munyń bári bıznestiń quqyǵy men zańdy múddesin qorǵaýǵa zor yqpal etti.
