«Іsker aımaq»: Shalǵaı aýyl turǵyndaryna keńes berý úshin mobıldi ofıster satyp alynady
ASTANA. KAZINFORM — «Іsker aımaq» baǵdarlamasyna qatysýshylar Óńdeý ónerkásibindegi shaǵyn jáne orta bıznes kásiporyndaryn jaraqtandyrý men qaıta jaraqtandyrýdyń jańa baǵdarlamasyna qatysa alady. Bul týraly búgin Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Biz shalǵaı aýyldardyń barlyǵynda Internet bola bermeıtinin túsinemiz. Osyǵan baılanysty konsýltatsııa berýdiń jáne aqparattyq súıemeldeýdiń kóshpeli formaty engiziletin bolady. Osy maqsatta konsýltatsııalyq qyzmetter kórsetý, ótinimderdi qabyldaý jáne jergilikti jerlerde memlekettik qoldaý sharalaryn túsindirý úshin qajetti jabdyqtarmen jáne baılanys quraldarymen jaraqtandyrylǵan mamandandyrylǵan mobıldi ofısterdi (avtobýstardy) satyp alý josparlanǵan, — dedi vıtse-premer.
Onyń atap ótýinshe, baǵdarlama óńirlerde turaqty kásipkerlik ortany qalyptastyrýǵa baǵyttalǵan jáne ekonomıkalyq damý men bıýdjettik ornyqtylyq arasyndaǵy tepe-teńdikti qamtamasyz etedi.
— Budan basqa, «Іsker aımaq» baǵdarlamasyna qatysýshylar Óńdeý ónerkásibindegi shaǵyn jáne orta bıznes kásiporyndaryn jaraqtandyrý men qaıta jaraqtandyrýdyń jańa baǵdarlamasyna qatysý múmkindigine ıe bolatynyn atap ótkim keledi. Lızıng boıynsha baǵdarlamany iske asyrý 2 myńnan astam jumys istep turǵan kásiporyndardy jańǵyrtýǵa, eńbek ónimdiligi men kásiporyndardyń básekege qabilettiligin arttyrýǵa múmkindik beredi. Qarjylandyrý qosymsha kepilsiz júzege asyrylady, — dedi ol.
Serik Jumanǵarınniń aıtýynsha, baǵdarlama aıasynda bir lızıng alýshyǵa arnalǵan lımıt 5 jylǵa deıingi qarjylandyrý merzimimen 300 mln teńgeden aspaıdy.
— «Ónerkásipti damytý qory» AQ 300 mlrd teńge qorlandyrý somasyna memlekettik ınvestıtsııalyq joba ázirleýde. Jalpy, «Іsker aımaq» baǵdarlamasy mıkro jáne shaǵyn bıznesti qoldaýǵa baǵyttalǵan, — dedi vıtse-premer.
Buǵan deıin «Іsker aımaq» baǵdarlamasy qandaı baǵyttarda iske asyrylatynyn jazǵan edik.