«Іsker aımaq» shaǵyn bıznesti qoldaýdyń biryńǵaı baǵdarlamasy ázirlendi
ASTANA. KAZINFORM — Búgin Úkimet otyrysynda shaǵyn jáne mıkro bıznesti naqty qoldaýǵa, óńirlerdiń ereksheligin eskere otyryp, óndiristi damytýǵa baǵyttalǵan keshendi baǵdarlama tanystyryldy.
Qýatty ári básekege qabiletti kásipkerliktiń damýy ornyqty ekonomıkalyq ósimniń negizgi faktory sanalady. Ózderińizge málim, jýyrda Memleket basshysy iskerlik belsendilikti yntalandyrý úshin jedel túrde shaǵyn bıznesti qoldaýdyń biryńǵaı baǵdarlamasyn qabyldaýdy tapsyrdy. Úkimet shaǵyn jáne mıkro bıznesti naqty qoldaýǵa, óńirlerdiń ereksheligin eskere otyryp, óndiristi damytýǵa baǵyttalǵan keshendi qujatty ázirledi, — dedi otyrysty ashqan Úkimet basshysy Oljas Bektenov.
Al baǵdarlamany tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarınniń aıtýynsha, osy jyl jańa salyq-bıýdjet saıasatynyń qabyldanýymen erekshelendi. Jańa fıskaldyq saıasatta bekitilgen negizgi qaǵıdattar, eń aldymen, óńirlik standarttar júıesi arqyly óńirler arasyndaǵy teńsizdikti tómendetýge, sondaı-aq kásipkerlikti, ásirese mıkro jáne shaǵyn bıznesti damytýdaǵy teńgerimsizdikterdi azaıtýǵa baǵyttalǵan.
— 2026 jyldan bastap fıskaldyq saıasat bıýdjettiń kiris bóligin shamamen qosymsha 4 trln teńgege ulǵaıtýdy kózdeıdi. Bul qosymsha qarjy resýrstary Prezıdent pen Úkimettiń tapsyrmasyna sáıkes, birinshi kezekte, qazaqstandyq bıznesti damytýǵa jáne qoldaýǵa baǵyttalatyn bolady. Salyq bazasyn keńeıtý qaǵıdaty sonymen qatar bıznes sýbektileriniń kirisin arttyrýymen birge jańa fıskaldyq saıasattyń aıqyndaýshy elementteriniń biri, — dedi ol.
Vıtse-premerdiń atap ótýinshe, Úkimet syrtqy faktorlar (logıstıka, kúrdeli halyqaralyq jaǵdaı jáne valıýtalyq aýytqýlar sııaqty), sondaı-aq ishki faktorlar (salyqtyq jáne tarıftik reformalar) eń aldymen shaǵyn jáne orta kásipkerlikke qosymsha júkteme túsiretinin tolyq túsinedi.
— Osyǵan baılanysty, bıyl 5 jeltoqsanda «Altyn sapa» jáne «Paryz» syılyqtarynyń laýreattaryn marapattaý rásiminde Memleket basshysy Úkimetke jańa Salyq kodeksiniń jekelegen normalary boıynsha bıznes ókilderiniń ótinishterin taldaýdy, oryndy teńgerim tabýdy tapsyrdy. Memleket basshysy bul jumysty memlekettik aýqymdaǵy mindet retinde atap ótti. Sonymen qatar shaǵyn bıznesti qoldaýdyń biryńǵaı baǵdarlamasyn jedel qabyldaýdy tapsyrdy. «Іsker aımaq» shaǵyn bıznesti qoldaýdyń biryńǵaı baǵdarlamasy Memleket basshysynyń tapsyrmasyna jaýap retinde Amanat partııasymen jáne «Atameken» ulttyq kásipkerler palatasymen birlesip ázirlendi. Baǵdarlama shaǵyn kásipkerlikti, eń aldymen, aýyldyq eldi mekender men shaǵyn qalalarda aýqymdy damytýǵa, jedel áleýmettik-ekonomıkalyq tıimdilikti qamtamasyz etetin tehnologııalyq jaǵynan qarapaıym, tez iske asyrylatyn jobalarǵa baǵyttalǵan. Baǵdarlamanyń basymdyǵy qosylǵan qunnyń jergilikti tizbegin, ornyqty óndiristik bazany jáne uzaq merzimdi ekonomıkalyq áserdi qalyptastyratyn aýyl sharýashylyǵy shıkizatyn qaıta óńdeý, shaǵyn naýbaıhanalar, sút jáne et jartylaı fabrıkattary, tamaq óndirý, aǵash óńdeý, jıhaz tsehtary jáne qurylys materıaldaryn óndirý, qolóner jáne ózge de baǵyttar sanalady.Baǵdarlamanyń negizgi tásili — óńirlik áleýetti jáne qajettilikterdi eskere otyryp, jergilikti atqarýshy organdardyń basym salalardyń qosymsha tizbesin qalyptastyrý arqyly kásipkerlikti damytý úshin óńirlerdi ortaq jaýapkershilikke tartý. Baǵdarlamada óńirlik ekonomıkanyń qurylymyn kórsetetin sýbsıdııalaý lımıtteriniń eki deńgeıli júıesi kózdeledi. Birinshi deńgeı — Abaı, Ulytaý, Jetisý, Soltústik Qazaqstan jáne Qyzylorda oblystary úshin bıýdjettiń 30 paıyzyna deıin sýbsıdııa bólý. Ekinshi deńgeı — qalǵan óńirlerge sýbsıdııalar bıýdjetiniń 70 paıyzyna deıin bólý. Eki deńgeı boıynsha qarjylandyrýdyń qoljetimdiligi kredıttiń búkil merzimine negizgi borysh somasynyń 80 paıyzyna deıin «Damý» qorynyń kepildikterin berýdi qosa alǵanda, sýbsıdııalaý jáne kepildik berý tetikteriniń úılesimimen qamtamasyz etiledi, — dedi Serik Jumanǵarın.