«Іsker aımaq» baǵdarlamasy shaǵyn bıznesti damytýdyń jańa biryńǵaı tásilin qalyptastyrady

ASTANA. KAZINFORM — Memleket basshysynyń kásipkerlikti qoldaý jónindegi tapsyrmasyn oryndaý úshin QR Úkimetiniń «Іsker aımaq» shaǵyn bıznesti qoldaýdyń biryńǵaı baǵdarlamasyn bekitý týraly» qaýlysynyń jobasy ázirlendi. Bul týraly Ulttyq ekonomıka mınıstrligi jarııalady.

Qujat QR Kásipkerlik kodeksiniń 94-babynyń 3-tarmaǵyna jáne 96-babynyń 5-tarmaǵyna sáıkes ázirlenip, búkil el boıynsha shaǵyn kásipkerlikti damytýdyń biryńǵaı, júıeli tásilin qalyptastyrýǵa arnalǵan.

Joba qarjylyq jáne qarjysyz quraldardy keshendi paıdalanýdy, sondaı-aq jobalardy iske asyrý úshin ınfraqurylymdyq qoldaýdy kózdeıdi.

— Shaǵyn bıznes sýbektilerine qarjylyq kómek kredıtter boıynsha paıyzdyq mólsherlemeniń bir bóligin sýbsıdııalaý jáne qaryzdarǵa kepildik berý arqyly beriledi. Bul sharalar qaryz qarajattarynyń qunyn tómendetýge jáne kepilmen qamtamasyz etý jetkiliksiz bolǵan jaǵdaılardy qosa alǵanda, nesıe resýrstaryna qoljetimdilikti keńeıtýge baǵyttalǵan. Qarjylyq emes qoldaý salalyq onlaın-oqytýdy, sondaı-aq kásipkerlerdi servıstik jáne aqparattyq-taldamalyq súıemeldeýdi qamtıdy, bul olardyń quzyretterin arttyrýǵa jáne jobalardy tabysty iske asyrýǵa yqpal etedi, — delingen aqparatta.

Infraqurylymdyq qoldaý shaǵyn bıznestiń ınjenerlik, óndiristik, logıstıkalyq, ótkizý jáne týrıstik ınfraqurylymdy qosa alǵanda, qajetti obektilerge — úı-jaılarǵa, jer ýchaskelerine jáne óndiristik qýattarǵa qol jetkizýin qamtamasyz etedi. Jergilikti atqarýshy organdar men «Atameken» UKP óńirlik mamandanýdy eskere otyryp, qyzmet túrlerin aıqyndaıdy, kásipkerlerdiń ótinimderin qaraıdy jáne bekitedi, sondaı-aq nátıjelerge keıinnen monıtorıng júrgize otyryp, ınfraqurylymdyq qoldaý kórsetedi.

Jobada kásipkerlikti damytý úshin ortaq jaýapkershilikke tartylatyn óńirlerdiń rólderi basymdyqqa ıe. Ol úshin jergilikti atqarýshy organdar áleýmettik-ekonomıkalyq áleýetti jáne ózekti qajettilikterdi eskere otyryp, basym taýashalardyń tizbesin qalyptastyrady, bul qoldaý sharalaryn neǵurlym dál baptaýdy qamtamasyz etedi jáne teńgerimdi aýmaqtyq damý úshin jaǵdaı jasaıdy.

Baǵdarlamada óńirlik ekonomıkanyń ereksheligin eskeretin kredıttik lımıtterdiń eki deńgeıli júıesi iske asyryldy.

Birinshi deńgeı óńirlik mamandanýǵa sáıkes keletin jáne halyqtyń ómir súrý sapasyn arttyrýǵa baǵyttalǵan jobalardy qamtıdy. Bul jergilikti shıkizatty paıdalana otyryp, tehnologııalyq turǵydan qarapaıym jáne tez júzege asyrylatyn óndiris: aýyl sharýashylyǵy ónimderin qaıta óńdeý, azyq-túlik shaǵyn óndiristeri, naýbaıhanalar, aǵash óńdeý jáne aýyldyq okrýgterdegi, aýdan ortalyqtaryndaǵy jáne shaǵyn qalalardaǵy qolóner qyzmetteri. Bul deńgeıge sýbsıdııalar bıýdjetiniń 70%-na deıin bólinedi.

Ekinshi deńgeı turaqty óndiristik bazany qalyptastyrýǵa, jumyspen qamtýdy keńeıtýge jáne óńirlerde uzaq merzimdi ekonomıkalyq tıimdilikti qurýǵa baǵyttalǵan tamaq óndirisi, jıhaz tsehtary jáne qurylys materıaldaryn óndirý salasyndaǵy shaǵyn bıznes jobalaryn qamtıdy. Bul deńgeı úshin sýbsıdııalar bıýdjetiniń 30% — na deıin kózdelgen.
Abaı, Ulytaý, Jetisý, Soltústik Qazaqstan jáne Qyzylorda oblystaryndaǵy ónerkásiptik jobalarǵa erekshe nazar aýdaryldy. Baǵdarlama barlyq aýyldyq aýmaqtardy qamtıdy jáne shaǵyn jáne orta bıznes jobalaryn qoldaıdy.

ShOB-tyń qarsy mindettemeleri jańa jumys oryndaryn qurýdy qamtıdy: ınvestıtsııalyq jobalar boıynsha-árbir 100 mln teńge kredıtke bir jumys orny, biraq jınaqtalǵan ınflıatsııa deńgeıinen tómen emes kiristi ulǵaıta otyryp, joba boıynsha keminde bir jumys orny. Aınalym qarajatyn tolyqtyrýǵa arnalǵan jobalar úshin tabys pen eńbekaqy tóleý qorynyń jınaqtalǵan ınflıatsııa deńgeıinen tómen emes ósýi mindetti shart bolyp tabylady.

— Baǵdarlamany qabyldaý kásipkerlik belsendilik ornyqty ósýdiń negizgi faktory bolyp tabylatyn aýyldyq eldimekender men shaǵyn qalalardy qosa alǵanda, shaǵyn bıznesti aýqymdy damytý úshin mańyzdy qadam bolady, — dep qosty mınıstrliktiń baspasóz qyzmeti.

Eske sala keteıik, buǵan deıin Prezıdent Qasym-Jomart Toqaev shaǵyn bıznesti qoldaýdyń biryńǵaı baǵdarlamasyn jedel qabyldaýdy tapsyrǵan bolatyn.