«Іsker aımaq» baǵdarlamasy qandaı baǵyttarda iske asyrylady

ASTANA. KAZINFORM — Búgin Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın «Іsker aımaq» shaǵyn bıznesti qoldaýdyń biryńǵaı baǵdarlamasy qandaı baǵyttarda iske asyrylatynyn aıtty. 

Onyń aıtýynsha, «Іsker aımaq» shaǵyn bıznesti qoldaýdyń biryńǵaı baǵdarlamasy ózara baılanysty úsh baǵyt boıynsha iske asyrylatyn bolady.

Birinshisi — qarjylyq sharalar. Qaryz qarjylandyrýdyń qunyn tómendetýge jáne shaǵyn bıznestiń kredıttik resýrstarǵa qoljetimdiligin keńeıtýge baǵyttalǵan syıaqy mólsherlemesiniń bir bóligin sýbsıdııalaý jáne kredıtterge kepildik berý arqyly júzege asyrylady.

Ekinshi — qarjylyq emes sharalar. Salalyq onlaın-oqytý, kásipkerlerdiń quzyretterin arttyrýǵa baǵyttalǵan servıstik jáne konsýltatsııalyq qoldaý kórsetiledi.

Úshinshi — ınfraqurylymdyq sharalar. Óndiristik jáne kommýnaldyq ınfraqurylymǵa qoljetimdilikti qamtamasyz etý, úı-jaılar men jer ýchaskelerin jeńildikpen jalǵa berý júzege asyrylady.

— Qazirgi ýaqytta aýyl kásipkerligin damytýǵa, onyń ishinde jergilikti resýrstarǵa baǵdarlana otyryp, qaıta óńdeýdi, qolónerdi jáne shaǵyn óndiristerdi damytýǵa baǵyttalǵan «Aýyl amanaty», «Bir aýyl — bir ónim» sııaqty baǵdarlamalar iske asyrylyp jatyr. Aýyl sharýashylyǵy kooperatıvteriniń jobalaryn qosa alǵanda, atalǵan baǵdarlamalar aıasynda iske asyrylatyn jobalar «Іsker aımaq» biryńǵaı baǵdarlamasymen qosymsha qoldaý ala alady jáne sýbsıdııalar, ınfraqurylymdyq jáne qarjylyq emes memlekettik qoldaý úshin júgingen kezde basym tártippen qaralatyn bolady, — dedi ol. 

Aıta ketelik Úkimet mıkro jáne shaǵyn bıznesti qoldaý sharalaryn talqylaıdy.