Іske qatysy bar basqa da tulǵalardy ustaý maqsatynda tergeý jalǵasyp jatyr
ASTANA. KAZINFORM — Kaspııdegi oqý-jattyǵý kezinde bolǵan qaıǵyly oqıǵaǵa baılanysty Qarýly Kúshterdiń joǵary jáne aǵa komandalyq quramyndaǵy birqatar laýazymdy tulǵa ustalǵany belgili.
ІІM iske qatysy bar basqa da tulǵalardyń sheńberin anyqtap, olardy ustaý maqsatynda tergeý jalǵasyp jatqanyn habarlady.
Al ustalǵandardyń qatarynda — QR QK Áskerı-teńiz kúshteri Bas qolbasshysynyń birinshi orynbasary — shtab bastyǵy, eki áskerı bólimniń komandıri, sondaı-aq teńiz jaıaý áskerleri rotasynyń jáne «Qaısar» kateriniń komandırleri bar ekeni habarlanǵan bolatyn.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
