Skatov pen Kýkýshkın Ýımbldon týrnıriniń irikteý saıysyn sátti bastady

ASTANA. KAZINFORM – Qazaqstandyq tennısshiler Ýımbldon týrnıriniń irikteý saıysynda bastapqy kezdesýlerin ótkizdi.

Álemniń 212-raketkasy Tımofeı Skatov irikteýdiń shırek fınalynda dúnıejúzilik reıtıngide 684-orynda turǵan ıtalııalyq Stefano Napolıtanomen sheberlik baıqasty.

Qazaqstandyq tennısshi 6:1, 6:4 esebimen jeńiske jetti. 

T.Skatov irikteý saıystarynyń fınalyna shyǵý úshin álemniń 144-raketkasy, belgııalyq Aleksandr Blokspen talasady. 

Reıtıngide 190-satydaǵy Mıhaıl Kýkýshkınge álemniń 120-raketkasy, brazılııalyq Tıago Ýaıld tap keldi. Birinshi partııada brazılııalyq tennısshi 6:4 esebimen basym tússe, ekinshisinde Kýkýshkın ese qaıyrdy – 6:4. Sheshýshi, úshinshi sette qazaqstandyq sportshy jeńisti julyp aldy – 6:3. 

M.Kýkýshkınniń kelesi qarsylasy – reıtıngide ózinen bes saty tómen turǵan danııalyq Aýgýst Holmgren.

Taǵy bir qazaqstandyq, reıtıngide 178-satydaǵy Dmıtrıı Popko álemniń 133-raketkasy, argentınalyq Roman Andres Býrrýchagaǵa jol berdi – 2:6, 1:6. 

Búgin sondaı-aq reıtıngide 251-oryndaǵy Beıbit Juqaev álemniń 213-raketkasy, ýkraınalyq Vıtalıı Sachkodan ótýge tyrysyp kóredi. 

Aldaǵy aptada bastalatyn Ýımbldonnyń negizgi jarysynda Qazaqstannan Aleksandr Býblık pen Aleksandr Shevchenko óner kórsetedi. 

Eske sala keteıik, budan buryn Aleksandr Býblıktiń álemdik reıtıngide TOP-30-ǵa kirgenin jazǵan bolatynbyz.