Skandınavııalyq júristiń paıdasy qandaı – sport dárigeriniń keńesi
NUR-SULTAN. QazAqparat – Skandınavııalyq júristiń paıdasy qandaı? Sporttyń bul túrimen kimder kóbirek shuǵyldanýy kerek? Bul suraqtar tóńireginde «Habar 24» arnasyndaǵy «Salaýat salty» baǵdarlamasynda sport dárigeri Berik Sáttiqylyshov aıtyp berdi, dep habarlaıdy QazAqparat tilshisi.
«Skandınavııalyq júris tek denege ǵana emes, adamnyń júıkesine de jaqsy áser etedi. Sporttyń bul túrine qatysty bizde áli durys túsinik qalyptasa qoıǵan joq. Sebebi qoǵamda bul sporttyń túrimen jasy kelgen kisiler aınalysady degen túsinik bar. Alaıda olaı emes. Bul jasóspirimderden bastap eresekter de, jasy kelgen kisiler de – bárine birdeı oń áserin tıgizetin sport», - deıdi sport dárigeri Berik Sáttiqylyshov.
Onyń aıtýynsha, skandınavııalyq júris sportyna kóp aqsha shyǵyndalmaıdy. Qalaı júrý jaıyn mamannan bilip alsańyz, kez kelgen ýaqytta shynyǵa berýge bolady. Sporttyń bul túrinde jaraqat alý kórsetkishi de tómen. Biraq shynyǵýǵa shyǵar aldynda deneni qyzdyryp alǵan durys. Sebebi skandınavııalyq júris eń qaýipsiz sport sanalsa da, keıbir adamdardyń aǵzasyna keri áserin tıgizeýi múmkin.
«Adamnyń dene qyzýy kóterilip turǵan jaǵdaıda sportpen aınalysýǵa bolmaıdy. Tek skandınavııalyq júris qana emes, kez kelgen sport túrimen temperatýra kóterilip turǵan jaǵdaıda shuǵyldanbaý kerek. Eger júrek dertteri, ınfektsııalyq aýrýlar bar bolsa, árıne sportpen aınalysýǵa shekteý jasalady», - deıdi ol.
Skandınavııalyq júrispen aınalysqan adamnyń boıyndaǵy bulshyq etterdiń 90 paıyzy shynyǵady. Al býyndary men omyrtqaǵa túsetin kúsh 30 paıyzǵa tómendeıdi. Júrek soǵysy jıilep, qan tamyrlary júıesine jaǵymdy áser etedi. Kalorııa jaı júristen qaraǵanda 45 paıyzǵa kóp jumsalady. Aǵzaǵa túsetin ottegi mólsheri 30 paıyzǵa kóbeıedi.
