Skandınavııada kúnniń ystyǵynan ońtústik Eýropaǵa tán gúlder ósip jatyr
ASTANA. QazAqparat - Soltústik Eýropada ornalasqan Shvetsııada qazan aıy shamadan tys jyly bolyp, qurlyqtyń ońtústiginde ósetin gúlder ósip jatyr. Bul jaıly shvetsııalyq BAQ-tarǵa silteme jasap «Azertadj» habarlaıdy.
Jergilikti ekologtar el ońtústiginde ádette Jerorta teńizi aımaǵynda ósetin jabaıy boıaýshóp gúliniń ósip turǵanyn kórgen. Ósimdiktiń Shvetsııaǵa qalaı kelip qalǵany belgisiz. Ǵalymdar ósimdik tuqymyn meken aýystyrǵan qustar nemese elge kelgen týrıster ákelgen bolýy múmkin dep boljap otyr. Tuqym munda birneshe jyl buryn kelip qalǵan bolýy da múmkin, ónip shyǵýǵa qolaıly aýa raıy qalyptasqan soń ǵana ósip shyqqan. Onyń ústine jyly aýa raıy da oǵan septigin tıgizgen.
Ekologtar sońǵy jyldary Shvetsııada mundaı tańǵajaıyp tabıǵat qubylystary kezdese bastaǵanyn aıtady. 2011 jyly 250 jyl ishinde alǵash ret jabaıy omela ósimdigi tabylǵan. Ol da boıaýshóp ósimdigi sııaqty jyly ólkelerde, naqtylap aıtqanda sýbtropıktik Afrıkada kezdesedi.
Mamandar Shvetsııada jáne Skandınav túbeginiń basqa da elderinde jyly aımaqtarǵa tán ósimdikterdiń ósýi jahandyq klımattyq ózgeristerdiń taǵy bir dáleli ekenin aıtady.
