«SQ-Farmatsııa» qarjy jymqyrý kúdigine ilikti: aýdıt pen tergeý neni anyqtady
ASTANA. KAZINFORM — «SQ-Farmatsııa» JShS-ne qatysty sotqa deıingi tergeý amaly bastaldy. Bul aqparatty Qarjy monıtorıngi agenttigi rastap otyr.
Agenttiktiń málimetinshe, Astana qalasy boıynsha ekonomıkalyq tergep-tekserý departamenti Qylmystyq kodeksiniń 189-baby 4-bóligi (senip tapsyrylǵan múlikti ıemdený nemese ysyrap etý) boıynsha «SQ-Farmatsııa» JShS qyzmetkerlerine qatysty sotqa deıingi tergep-tekserý amaldary júrip jatyr.
Qylmystyq-protsestik kodekske sáıkes, atalǵan iske qatysty ózge málimet jarııa etilmeıdi.
Densaýlyq saqtaý mınıstrliginiń halyqty dári-dármekpen qamtamasyz etý qyzmetine júrgizilgen aýdıt qorytyndysy boıynsha kelesi faktiler anyqtaldy:
— Mınıstrlik «Ǵylymı-ınfektsııalyq preparattar ortalyǵy» AQ-qa klınıkalyq zertteýler júrgizý boıynsha is júzinde oryndalmaǵan jumystar úshin 166 427,3 myń teńge, sondaı-aq ǵylymı-tehnıkalyq baǵdarlama aıasynda is júzinde jetkizilmegen 4 birlik jabdyq úshin 36 634,1 myń teńge kóleminde tólem jasaǵan;
— 13 túrli preparatty satyp alý kezinde baǵa aıyrmashylyǵy anyqtalǵan. Bul rette satyp alý baǵasy naryqtyq baǵadan 600%-ǵa deıin joǵary bolǵan. Bul jaǵdaı negizinen tegin ambýlatorııalyq kómekke arnalǵan dári-dármektiń zańsyz esepten shyǵarylyp, bólshek saýdada satylýymen baılanysty;
— «QazMedProm» JShS «SQ-Farmatsııa» JShS-ne medıtsınalyq qolǵapty naryqtaǵy baǵadan joǵary qunmen satqan, bul bıýdjet qarajatynyń tıimsiz jumsalýyna ákelgen;
— Aýdıt barysynda Májilis depýtaty Baqytjan Bazarbektiń «SQ-Farmatsııa» JShS-niń dári-dármek satyp alý kezinde memleket bıýdjetin 35,8 mlrd teńge zalal keltirdi degen málimdemesi rastaldy.
Densaýlyq saqtaý mınıstrliginiń halyqty dári-dármekpen qamtamasyz etý qyzmeti boıynsha júrgizilgen aýdıt kelesi zań buzýshylyqtardy anyqtady:
— 203 061,4 myń teńge kóleminde ótelýge jatatyn qarjylyq zań buzýshylyq;
— 24 970 967,7 myń teńge somasynda bıýdjet qarajatyn tıimsiz paıdalaný.
Sondaı-aq bıyl maýsymda qylmystyq quqyqbuzýshylyq belgileri bar aýdıt materıaldary Bas prokýratýraǵa shara qabyldaý úshin joldanǵany habarlandy.
Eske sala ketsek, «SQ Farmatsııa» kompanııasyndaǵy sybaılastyq ymyra áreket týraly 2017 jyly da jazǵan edik.
2020 jyly «SQ Farmatsııa» qyzmetine tekseris júrip jatqany habarlandy.
Aıta ketsek, bıyl Májilis depýtaty Baqytjan Bazarbek bıýdjet qarajatyn jymqyrý faktisi boıynsha Bas prokýratýraǵa 4 aryz beretinin málim etti. Onyń ishinde «SQ Farmatsııa» kompanııasy da bar.
Onyń atap ótýinshe, aryzdar mynadaı 4 baǵytqa qatysty: «SQ-Farmatsııa» men iri farmatsevtıkalyq kompanııalar qyzmetin qosa alǵanda atalǵan salaǵa júrgizilgen aýdıt nátıjeleri, Mindetti áleýmettik medıtsınalyq saqtandyrý júıesi aıasynda qarajat jymqyrý, aýyl sharýashylyǵynda sýbsıdııa bólý máselesi, sondaı-aq 27 maýsymda maquldanǵan Úkimet esebi.