«SQ-Farmatsııa» dıabetpen aýyratyn naýqastardyń tegin dári-dármek joqtyǵyna qatysty shaǵymyna jaýap berdi
ASTANA. KAZINFORM — «SQ-Farmatsııa» JShS basqarma tóraǵasy Nurlybek Asylbekov qant dıabetimen aýyratyn naýqastardyń «Djardıns» jáne «Glıýkonıl» tegin dárilerin alýdaǵy bógelisterge qatysty shaǵymdaryna túsinikteme berdi.
Buǵan deıin patsıentter keıbir emhanalarda qajetti dári-dármekterdiń joq ekenin, osyǵan baılanysty jańa jetkizilimderdi kútýge májbúr ekenin aıtyp, shaǵymdanǵan bolatyn. Bul máselege Qazaqstan Halyq Keńesiniń múshesi Murat Ábenov te áleýmettik jelidegi paraqshasynda nazar aýdarǵan.
Nurlybek Asylbekovtiń aıtýynsha, Qazaqstan qant dıabetin emdeýge arnalǵan 50 túrli dári-dármek satyp alady. Oǵan jalpy 60 mlrd teńge bólingen. Qazirgi ýaqytta elimizdiń medıtsınalyq uıymdaryna qajetti dári-dármek kóleminiń 95%-y jetkizilgen.
— Sondyqtan dári-dármekpen qamtamasyz etilmeý máselesi joq. Keıde jańadan anyqtalǵan naýqastar bolady. Olardy qosymsha ótinimder arqyly jáne tómendetilmeıtin qor esebinen qamtamasyz etemiz. Al «Glıýkonıl» men «Djardıns» preparattary boıynsha qamtamasyz etý deńgeıi — 95-97%, — dedi «SQ-Farmatsııa» basshysy Úkimettegi brıfıngte.
Aıta keteıik, buǵan deıin Densaýlyq saqtaý mınıstrligi balalar arasynda qant dıabetine shaldyqqandar kóbeıip kele jatqanyn málimdegen edi.
