«SK-Farmatsııaǵa» júktelgen tapsyrystardyń bir bóligi aımaqtarǵa berilýi múmkin - respýblıkalyq keńes
ASTANA. Sáýirdiń 2-si. QazAqparat /Gúlmıra Álıakparova/ - «SK-Farmatsııa» júktelgen tapsyrysty oryndaı almasa, dári-dármekterdi satyp alýdy aımaqtarǵa berý qajet. Bul týraly búgin QR Densaýlyq saqtaý mınıstrliginde Biryńǵaı ulttyq densaýlyq saqtaý júıesi men Densaýlyq saqtaý isin damytýdyń 2011-2015 jyldarǵa arnalǵan memlekettik baǵdarlamasynyń jobasyn talqylaýǵa arnalǵan respýblıkalyq keńeste QR Premer-Mınıstriniń orynbasary Erbol Orynbaev aıtty,
dep habarlaıdy QazAqparat.
E.Orynbaev keńes barysynda kepildendirilgen tegin medıtsınalyq kómek aıasynda dári-dármekterdiń 2010 jylǵy kólemine satyp alýlar júrgizgen «SK-Farmatsııa» JShS-nyń atqarǵan jumysyna qanaǵattanbaıtynyn bildirip, Densaýlyq saqtaý mınıstri J.Dosqalıevqa búgingi kúnniń sońyna deıin bul máseleni dárigerlermen keńesip, qajet bolǵan jaǵdaıda «SK-Farmatsııaǵa» tapsyrylǵan preparattardyń bir bóligin aımaqtarǵa berýdi tapsyrdy.
SK-Farmatsııa» bas dırektorynyń orynbasary Janaıdar Mýsın baıan etkendeı, búgingi kúnge deıin dári-dármekterdi satyp alý boıynsha jalpy somasy 26 mıllıard teńgege barlyǵy 1161 kelisimshartqa qol qoıyldy. «Búgingi kúni kompanııaǵa satyp alý tapsyrylǵan preparattardyń 685 túriniń 608-i qoımalarǵa jetkizildi. Qalǵandary jetkizilý ústinde», - deıdi ol.
J.Mýsınniń aıtýynsha, jetkizýshilerdiń kinásynan qazirgi ýaqytta memlekettik tapsyrystyń tek 60 paıyzy ǵana oryndaldy. Preparttardyń qalǵan 40 paıyzy, onyń sózine qaraǵanda biryńǵaı destrıbıýtordyń qoımasynda tur. Kedendik resimdeýler aıaqtalǵannan keıin, aldaǵy 10 kúnniń ishinde olar da aımaqtarǵa jetkiziletin bolady.
