SQ-Farmatsııa tehnıkasyn satyp alýdyń jańa jobasy bıyl pılottyq rejımde iske asyrylmaq

NUR-SULTAN. QazAqparat - «SQ-Farmatsııa» JShS bazasynda medıtsınalyq tehnıkany ortalyqtandyrylǵan satyp alýǵa kóshý máseleleri Úkimettiń Tsıfrlyq keńsesinde QR Premer-Mınıstri Álıhan Smaıylov ótkizgen keńeste qaraldy, dep habarlaıdy QazAqparat Úkimettiń resmı saıtyna silteme jasap.

Densaýlyq saqtaý mınıstri Ajar Ǵınııat «SQ-Farmatsııa» JShS medıtsınalyq tehnıkasyn ortalyqtandyrylǵan satyp alýǵa kóshý Memleket basshysynyń tapsyrmasyna sáıkes júrgizilip jatqanyn eske saldy.

Bıyl jobany pılottyq rejımde iske asyrý josparlanyp otyr, al 2023 jyldan bastap jabdyqtardy jergiliktendirý nemese kelisimsharttyq negizde óndirý boıynsha uzaq merzimdi sharttar jasalady.

Talqylaý qorytyndysy boıynsha Úkimet basshysy beıindi mınıstrlikke ákimdikter kótergen máselelerdi eskere otyryp, ortalyqtandyrylǵan satyp alý tetikterin pysyqtaýdy jáne Úkimetke tıisti usynystar engizýdi tapsyrdy.

Buǵan deıin Úkimet basshysy azyq-túlik baǵasyn ustap tura almaıtyn oblys ákimderiniń orynbasarlaryna shara qoldanylatynyn aıtty.