«SK-Farmatsııa» medıtsınalyq preparattardyń qosymsha qoryn daıyndady
«Dúnıejúzilik densaýlyq saqtaý uıymy jaǵdaıdy baqylap, árdaıym monıtorıng júrgizip otyr. Uıym epıdemııaǵa qarsy engizilgen sharalardy taldaıdy. Al bizdiń aldymyzǵa naqty mindet qoıyldy. Ol – vırýsqa qarsy medıtsınalyq quraldarmen, qyzý túsiretin preparattarmen, qorǵanys quraldarymen qamtamasyz etý. Tapsyrmalardyń biri oryndaldy. ıAǵnı koronavırýs ınfektsııasyn juqtyrǵandar sany artqan jaǵdaıda kerekti medıtsınalyq preparattardyń qoryn quryp qoıdyq. Osylaısha naýqas sany 10 myńǵa jetken jaǵdaıǵa arnap qor jasadyq. Qajettilik týyndasa biz bul preparattardy qoımadan alyp shyǵyp, halyqty qamtamasyz etemiz», - dedi Berik Shárip Sybaılas jemqorlyqqa qarsy is-qımyl agenttiginiń Facebook paraqshasynda onlaın-rejımde ótken jıynda.
Onyń aıtýyna qaraǵanda, koronavırýspen kúres tásilderiniń álemde sıpaty ártúrli. Sol sebepti tirkelgen naýqas sany da árqıly.
«Búkil álem ıek artyp otyrǵan eki amal bar. Biri – karantın sharalaryn engizý. Ekinshisi – Shvetsııa, Belarýs tańdaǵan ádis. ıAǵnı ekinshi ataǵanym – karantın tártibin qolaı kórmegen memleketter. Alaıda biz karantın engizbesek, naýqastar sany kúrt ósip ketetinin uǵýymyz kerek. Mysaly 18 mıllıon halqy bar Qazaqstanda naýqas sany úsh myńnyń mańaıynda. Al 10 mıllıon turǵyny bar Belarýste naýqas sany 10 myńnan asyp jyǵyldy. Kúres ádisi ártúrli bolǵannan keıin sandar da bólek. Naqty qaı ádistiń nátıjeli ekenin epıdemııa bitkennen keıin kóre jatarmyz», - deıdi Berik Shárip.