SK-Farmatsııa COVID-19-dy emdeıtin dári-dármektiń 91 túrin satyp alǵan
NUR-SULTAN. QazAqparat - Covid-19 emdeý jónindegi klınıkalyq hattamaǵa engizilgen 91 dárilik zat juqpaly aýrýlar aýrýhanalaryna jáne ýaqytsha ortalyqtarǵa jóneltildi.Bul týraly Ortalyq kommýnıkatsııalar qyzmetinde ótken «KVI jaǵdaıyna baılanysty dári -dármekpen qamtý máselesi: baǵa, sapa, halyqty qamtamasyz etý» taqyrybynda ótken onlaın brıfıngte aıtyldy, dep habarlaıdy QazAqparat tilshisi.
«Covid-19 emdeý jónindegi klınıkalyq hattamaǵa engizilgen 91 dárilik zat juqpaly aýrýlar aýrýhanalaryna (189 aýrýhana) jáne ýaqytsha ortalyqtarǵa (330 ortalyq) jóneltildi. Koronavırýs ınfektsııasy bastalǵannan beri 12,8 mıllıard teńgeniń dári-dármekteri jóneltildi», - deıdi «SK-Farmatsııa» JShS Basqarma tóraǵasy Erhat Esqalıev.
Onyń aıtýynsha, shilde aıynyń basynan bastap aýrýhanalardaǵy dári-dármek tapshylyǵy máselesin shuǵyl sheshý úshin jospardan tys 2,6 mıllıard teńge kólemindegi aılyq rezerv jiberildi.
«Oblys ákimdikterimen kelise otyryp, qaldyqtar turaqty túrde tekserilip otyrady. Shuǵyl qajettiliktegi dári-dármekterge jospardan tys shyǵyndar, sondaı-aq osy saladaǵy dári-dármekterdiń boljaldy qajettiligi úshin taldaý jasalady», - dedi spıker.
Ol aýrýhanalardan qosymsha ótinishter áli de kelip jatqandyǵyn aıtty.
«Qosymsha ótinishter áli qabyldanýda, onyń ishinde shilde aıyna da qatysty ótinishter. Sonymen birge biz 8,7 mlrd teńgege qosymsha satyp alýlar júrgizip jatyrmyz. Medıtsınalyq uıymdarǵa qajetti COVID-19-dy emdeıtin dári-dármektiń qosymsha 91 túrin jedel satyp aldyq. 10-15 tamyzda biz qosymsha tutynýdy qamtamasyz etemiz, sáıkesinshe jedel satyp alamyz. Bul medıtsınalyq uıymdardyń qosymsha qajettilikterin qanaǵattandyrady, aýrýhanalardy tapshy dári-dármektermen qamtamasyz etedi jáne aýrýhanalarda shuǵyl qajet dári-dármekter rezervin qurady», - deıdi Erhat Esqalıev.
