«SK-Farmatsııa» basshysy qansha jalaqy alady
NUR-SULTAN. QazAqparat – «SK-Farmatsııa» JShS basqarma tóraǵasy Erhat Esqalıev qansha jalaqy alatyndyǵyn jarııa etti, dep habarlaıdy QazAqparat tilshisi.
«Jalaqyma qatysty aıtar bolsam, ol 750 myń teńgeden bastalady. Biraq, meniń jumysqa kiriskenime bir aı da bolǵan joq. Taıaýda keńes barysynda jalaqynyń tıisti deńgeıi bekitilýi tıis. Al ákimshilik shyǵyndarǵa baılanysty jumys tobyn qurdyq. Qazirdiń ózinde esep-qısabyn aıaqtap qaldyq. Jaldaý shyǵyndaryn 10 paıyzǵa, jalǵa alynatyn alańdar kólemin 20 paıyzǵa deıin qysqartý kózdeledi», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń dereginshe, jyl sońyna deıin «SK-Farmatsııa» shyǵyndaryn 200 mln teńgege deıin tómendetý josparlanyp otyr.
«Degenmen, bul sońǵy tsıfr emestigin atap ótkim keledi. Jumysty jalǵastyryp jatyrmyz. Bizge shyǵyndardy ulǵaıtpaı jedel qor qurý, jeke naryq jáne gýmanıtarlyq júk syndy qosymsha qyzmetter júktelip otyr. Biz barynsha tıimdi jumys isteýge tyrysamyz», - dedi Erhat Esqalıev.
