«SQ-Farmatsııa» basshysy gýmanıtarlyq kómekti úlestirý tártibin aıtty
NUR-SULTAN. QazAqparat – «SQ-Farmatsııa» JShS-nyń basqarma tóraǵasy Erhat Esqalıev óńirlerde dári-dármek qoryna qatysty monıtorıng júrgizilgenin aıtty, dep habarlaıdy QazAqparat tilshisi.
«Bıylǵy qazan aıynyń ekinshi onkúndiginen bastap Sybaılas jemqorlyqqa qarsy qyzmet Nur-Sultan, Almaty, Shymkent qalalarynda, sondaı-aq barlyq 14 oblys ortalyqtarynda jurtshylyqtyń, BAQ-tyń qatysýymen dárilik zattardyń, onyń ishinde 2 aılyq tómendetilmeıtin qordyń bolýyna monıtorıng júrgizdi. Medıtsına qyzmetkerlerine arnalǵan jeke qorǵaný quraldaryn jergilikti atqarýshy organdar Úkimet rezerviniń qarajatynan derbes satyp aldy jáne 3 aılyq qor quryldy. Jergilikti atqarýshy organdar turaqtandyrý qorlary qarajatynan qosymsha jeke qorǵaný quraldaryn satyp aldy», - dep túsindirdi E. Esqalıev Ortalyq kommýnıkatsııalar qyzmetinde.
Sonymen qatar, Úkimet gýmanıtarlyq kómek aıasynda alynǵan bir ret qoldanylatyn 400 myń qorǵanysh kostıými kóleminen jeke qorǵaný quraldary rezervin qurý máselesin qosymsha pysyqtady. Bul kólem koronavırýstyń yqtımal jańa tolqyny jaǵdaıynda paıdalaný úshin qosymsha rezerv retinde Biryńǵaı dıstrıbıýtordyń 4 HABynda saqtalatyn bolady.
«Gýmanıtarlyq kómekti bólý máselesine toqtalǵym keledi. Gýmanıtarlyq júkterdi kidirtýge jol bermeý jónindegi shuǵyl is-sharalardy júrgizý aıasynda elge jiberiletin gýmanıtarlyq júk boıynsha qujattar jiberiletin kezde aldyn ala habardar etý modeli ázirlenip, engizildi. Osyǵan baılanysty gýmanıtarlyq kómek máselelerine jetekshilik etetin jaýapty tulǵalardyń (QR DSM, SІM, keden qyzmeti, avıakólik kompanııalary, áýejaılar men ákimdikter) tizimi qalyptastyryldy. Jurtshylyq pen Sybaılas jemqorlyqqa qarsy qyzmet ókilderiniń qatysýymen dári-dármekterdi bólýdiń ashyq monıtorıngi qamtamasyz etildi. Gýmanıtarlyq júkterdiń kelýi, sondaı-aq óńirlerge medıtsınalyq uıymdarǵa deıin jóneltý jónindegi barlyq aqparat jarııalanady jáne «SQ-Farmatsııa» saıtynda kún saıyn jańartylyp otyrady», - dedi Erhat Esqalıev.
