«SK-Farmatsııa» 2009 jyldan beri 37 mlrd. teńge bıýdjet qarjysyn únemdedi (FOTO)

ASTANA. QazAqparat - «SK-Farmatsııa» JShS 2009 jyldan beri 37 mlrd. teńge bıýdjet qarjysyn únemdedi. Bul týraly búgin atalǵan seriktestiktiń keńeıtilgen otyrysy barysynda QR DSÁDM Medıtsınalyq jáne farmatsevtıkalyq qyzmetti baqylaý komıteti tóraǵasynyń orynbasary Larısa Pak málim etti.

«Eger 2009 jyly biryńǵaı dıstrıbıýter dári-dármektiń 27 túrin satyp alsa, búgingi kúni olardyń sany 900-den astamǵa jetip otyr», dedi ol.

Onyń atap ótýinshe, búgingi kúni biryńǵaı dıstrıbıýterdiń halyqty dári-dármekpen qamtamasyz etýdegi róli óte joǵary. Seriktestik qurylǵan sátte onyń aldyna halyqty dári-dármekpen úzdiksiz qamtamasyz etý, farmatsevtıka óndirisiniń sapasyn arttyrý, sonymen qatar bıýdjet qarjysyn únemdeıtin júıe qurý mindeti qurylǵan bolatyn.

«Biryńǵaı dıstrıbıýterdiń 5 jyldyq tájirıbesi onyń derbestigin kórsetip berdi. Olar sııaqty birde bir medıtsınalyq uıym dári-dármekti tómen baǵaǵa satyp ala almas edi. Búgingi kúni 2009-2015 jyldary aralyǵynda únemdelgen bıýdjet qarjysyn anyq kórip otyrmyz. Qazirgi ýaqytta bıýdjet qarjysy shamamen 37 mlrd. teńgege únemdelip otyr. Óıtkeni, Biryńǵaı dıstrıbıýter dári-dármekti irikteý jáne baǵany tómendetý ádisimen satyp aldy», - dedi L.Pak.