«SK-Astana» qorynda jańa bas dırektor tanystyryldy

ASTANA. 29 jeltoqsan. QazAqparat - Búgin Astanada «Samuryq-Qazyna» AQ apparatynyń basshysy Ulan Tájibaev «SK-Astana» birlesken qory ujymyna jańa bas dırektor Erlan Dárimovty tanystyrdy.

Bul týraly qordyń baspasóz qyzmetinen habarlady.

 Erlan Qojabergenuly Dárimov A.Baıtursynov atyndaǵy Qostanaı memlekettik ýnıversıtetin «Qarjy jáne nesıe» mamandyǵy boıynsha támamdady. «Qarjy» mamandyǵy boıynsha ekonomıka jáne bıznes salasyndaǵy magıstr bolyp tabylady.

 Eńbek jolyn «Qostanaı oblystyq qarjy departamenti MM-niń memlekettik kásiporyndaryndaǵy ishki baqylaýdy júzege asyrý bóliminiń jetekshi mamany retinde bastady.

 2011 jyly «Qazagromarketıng» AQ-nyń ishki aýdıt qyzmetin basqardy. 2012 jyldyń naýryz aıynan bastap  «SK-Astana» birlesken qory bas dırektorynyń mindetterin atqarýshy, qazirgi kezde  onyń dırektory bolyp tabylady.

 «SK-Astana» birlesken qory 2 jyl boıy «Samuryq-Qazyna» ulttyq ál-aýqat qorynyń áleýmettik jáne qaıyrymdylyq jobalaryn úılestirý jáne basqarýmen aınalysady.