«Sizge áleýmettik tólem tıesili»: Alaıaqtyqtyń taǵy bir túri shyqty
Nur-Sultan qalasy Polıtsııa departamenti baspasóz qyzmetiniń habarlaýynsha, kópbalaly analardy áleýmettik tólem týraly jalǵan habarmen aldap kelgen Shymkent qalasynyń eki turǵynyn ustalǵan.
24 jastaǵy jigit pen qyz elorda turǵyndaryna qońyraý shalyp, ózderin Halyqqa qyzmet kórsetý ortalyǵynyń áleýmettik tólemder bóliminiń qyzmetkeri retinde tanystyryp otyrǵan. Senimge kirgennen keıin olar memleket kópbalaly analarǵa áleýmettik tólem jasap jatqanyn aıtyp qýantqan. Ol úshin kópbalaly ana «áleýmettik tólemniń 10% mólsherinde aıyppul bereshegin tóleýi qajet» bolǵan.
Aldanǵan analar orta jolda aınyp ketpes úshin kúdiktiler aıyppuld tóleý úshin jeke sot oryndaýshylary palatasynyń qyzmetkerine habarlasý kerektigin aıtyp, jalǵan nómirler usynǵan. Aqsha aýdarylatyn shot sol nómir arqyly berilgen. Opyq jegen analar aqsha aýdarǵannan keıin kúdiktiler nómirlerin aýystyryp otyrǵan.
«Alaıaqtardyń shemasyna elordalyq kópbalaly eki ana urynyp, jalǵan shottarǵa 40 myń teńgeden aqsha aýdarǵan. Qazir kúdiktilerdiń ústinen Qylmystyq kodekstiń 190-baby (alaıaqtyq) boıynsha tergeý bastaldy. Aıyp dáleldense, olar 4 jylǵa deıin bas bostandyǵynan aıyrylýy múmkin», - dep jazylǵan departamenttiń dereginde.
Polıtsııa qazir qomaqty áleýmettik kómek túskeni týraly aldamshy aqparattar kóbeıgenin, sonyń deni alaıaqtyq shemalar jasaý úshin taratylatynyn eskertedi.
«Ádette ózin halyqqa qyzmet kórsetý ortalyǵynyń qyzmetkeri retinde tanystyratyn qaskúnemderdiń aldaýyna túsetinder kóp.
Mundaı alaıaqtyqtyń keıbir belgileri:
- qalypty abonenttik nómirden qońyraý shalý;
- tólqujat derekterin suraý;
- túsiniksiz aıyppuldar boıynsha bereshek bar ekenin aıtyp bopsalaý;
- bógde nómirden SMS kodyn jiberý, (1414 emes);
- aqsha aýdarý qajet shottardy usyný», - delingen polıtsııa málimetinde.
Nur-Sultan qalasy Polıtsııa departamenti osyndaı áreketterdiń qurbany bolmaý úshin mynadaı qarapaıym saqtyq sharalaryn ustanýdy usynady:
- HQKO qyzmetkeriniń aty-jónin, fılıaldyń mekenjaıyn bilip, HQKO-nyń resmı nómirinen qońyraý shalýdy surańyz;
- eger beıtanys adam sizdiń jeke kýáligińizdiń sýretin jiberip, túpnusqany kórsetýdi surasa, senýge asyqpańyz. HQKO qyzmetkerleri klıentterge eshqashan qońyraý shalmaıdy, barynsha jaqyn ornalasqan HQKO bólimine júginýdi suraıdy;
- jeke sot oryndaýshysynyń aty-jónin bilip, ony resmı saıttan tabýǵa bolatyn tizimnen tekserińiz.