Siz qansha tiri bala týdyńyz: Sanaqtaǵy suraqqa qatysty Ulttyq bıýro túsinik berdi

NUR-SULTAN. QazAqparat – Búginde elimizde halyq sanaǵy júrip jatyr. Qazaqstandyqtar onlaın sanaqqa qatysý úshin aldymen arnaıy saýalnamany toltyrýy tıis. Osy oraıda kópshilik sanaq saýalnamasyndaǵy «Siz qansha tiri bala týdyńyz?» degen suraqty túsinbeı, jeli qoldanýshylary arasynda keń talqyǵa tústi. Óz kezeginde elimizdiń Ulttyq statıstıka bıýrosy resmı túsinikteme berdi, dep habarlaıdy QazAqparat tilshisi.

«Áleýmettik jelilerde sanaq saýalnamasyndaǵy «Siz qansha tiri bala týdyńyz?» degen saýal tóńireginde pikirtalas órbip jatyr. Atalǵan suraq Eýropalyq statıster konferentsııasynyń usynysymen qosylǵan bolatyn. Halyq sanaǵyn ótkizýde sońǵy 50 jyl boıy áıelderdiń tiri týǵan balalary jónindegi saýal keńinen qoldanylyp keledi. Sol sekildi bul suraq demografııalyq zertteý úshin de udaıy qoıylady. Jáne de saýalnama bıyl elimizde sanaqqa deıin jáne keıin dúnıege kelgen sábıler men olardyń jynysyn anyqtaý suraǵymen tolyqty. Suraqtyń jaýaby náreste ólimi kórsetkishin balanyń jynysyna qaraı tereń taldaýǵa qoldanylady», - dedi QR Ulttyq statıstıka bıýrosynyń resmı ókili Oljas Saılaýbekuly.

Sondaı-aq, resmı ókil atalǵan saýaldyń elimizdegi bala týý kórsetkishine qatysty derekter jınaýda mańyzdy ekenin eske saldy.

«Kóp jaǵdaıda mundaı málimetti basqa jerden alý múmkin emes. Atap óterligi, bul suraqqa tek qana reprodýktıvti jastaǵy áıelder ǵana jaýap bermeıdi. Alynǵan málimetter ár kezeńdegi týý men ólim tendentsııasyn salystyrý jáne baǵalaý úshin de qajet», - deıdi ol.