Siz aıttyńyz, biz sendik - mınıstr 42 500 teńgeni taǵaıyndaý týraly

NUR-SULTAN. QazAqparat - Jeke tulǵalardyń memleketten 42 500 teńge mólsherinde áleýmettik tólem alýynyń zańdylyǵy tekserilmeıdi. Bul týraly búgin Ortalyq kommýnıkatsııalar qyzmetindegi brıfıngte QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

Brıfıng barysynda mınıstrge «Memleketten 42 500 teńge áleýmettik tólemdi zańsyz alǵandar jaýapqa tartyla ma?» degen suraq qoıylǵan edi.

«Mynadaı qıyn kezeńde bir-birimizge túsinistikpen qaraýymyz kerek. Memleket tarapynan Eńbek mınıstrligi retinde eshkimdi tergep, «dáleldeńder, qujat ótkizińizder» dep jatqanymyz joq. Bárin qarapaıym jasap qoıdyq. Ózderińiz úshin mynany sheship alyńyzdar: «Men tirshilik jasap, aqsha taptym ba? Sol aqshadan qazir aıyryldym ba?». Solaı ekendigine senimdi bolyp, ótinish berdińiz. Sóıtip, ótinish bergende portalda bolsyn, basqa jerde bolsyn tómendegi jazbada «Aı saıyn taýyp júrgen aqsham bolǵan, sodan aıyryldym» dep belgiledińiz. Biz sizge sendik, tóledik», - dedi Birjan Nurymbetov.

Sonymen qatar ol aldaǵy ýaqytta jumys berýshiler tekseriletindigin basa aıtty.

«Al jeke tulǵalarǵa úıine baryp tekserý bolmaıdy. Bul jerde bylaı, siz aıttyńyz, biz sendik. 42 500 teńge aldyńyz ba, alyńyz, jaratyńyz. Aı saıyn tólep turamyz», - dedi mınıstr.